“Amerika Çini nəzarətdə saxlamaq üçün Əfqanıstandan hərbi baza istəyir”.
Bu sözləri Yeniera.az-a açıqlamasında beynəlxalq məsələlər üzrə ekspert Əziz Əlibəyli Pakistan-Əfqanıstan arasındakı gərginlik fonunda danışarkən deyib.
Onun sözlərinə görə, unutmaq lazım deyil ki, ABŞ Əfqanıstandan çıxanda təxminən 50 milyardlıq silahı Talibana verib:
“Burada məqsəd isə o idi ki, onsuz da Taliban qeyri-stabil bir qruplaşmadır, hələ dövlət ola bilmir və açığı dövlət olacaqları da real görünmür, bunu sadəcə zaman göstərəcək. Çünki bölgə olduqca strateji nöqtədədir və buradan Rusiyaya, Çinə, İrana, Hindistana və Pakistana hər formada təsir göstərmək mümkündür. Ona görə də bu qədər silahın verilməsi gələcəkdə burada böyük qarşıdurma imkanlarına şərait yaratmaq üçün idi”.
Ə.Əlibəyli qeyd edib ki, Pakistan son zamanlar Azərbaycan-Türkiyə tandemi ilə Yaxın Şərqdə son dərəcə böyük rol oynamağa başlayıb və Səudiyyə Ərəbistanı ilə təhlükəsizlik paktı imzalayıb:
“Qərb bunu xoşlamadı, İsraildə də qıcıq doğurdu və HƏMAS məsələsində Pakistan vacib bir nöqtədə dayandı. Ona görə də əvvəlcə Hindistanı Pakistanın üzərinə qaldırdılar, amma güc balansında Pakistan Hindistanı əzdi, sonrakı proseslərdə də artıq onlar Puştu məsələsini qaldırdılar ki, münaqişə meydana çıxsın.
Təbii ki, Əfqanıstanın Qərb dövlətləri agentura var, Talibanı da Pakistan üzərindən təhrik edirlər. Amma görünən odur ki, Əfqanıstanla Pakistanı savaşdırmaq nəticə verməz. Çünki Pakistan nüvə dövlətidir və nüvə dövlətinin olması onun cəzalandırılmasına gətirən əsas məsələdir. Bu baxımdan çalışırlar ki, münaqişə ocağı yaransın, Kəşmir məsələsi ön plana çıxsın. Lakin unutmaq lazım deyil ki, Çin Pakistanın əsas müttəfiqidir. Yeri gəlmişkən, bu prosesin başqa bir qolu Nepalda icra olunur”.
Mikayıl Mirzəzadə
