Ötən gün general-mayor İlqar Rza oğlu Abbasov Azərbaycan Respublikası Strateji Obyektlərin Mühafizəsi Dövlət Agentliyinin (SOMDA) rəisi vəzifəsindən azad edilib. Onun əvəzinə Sərdar Səfərov təyin edilib.
Yeniera.az xəbər verir ki, “unikal” saytı generalın işdən çıxarılmasının səbəbləri barədə yazıb.
Qeyd olunur ki, İlqar Abbasovun işdən çıxarılmasına səbəb onun işçiləri ilə çox kobud rəftar etməsi olub. Belə ki, o, SOMDA-nın əməkdaşları ilə danışarkən bəzən qeyri-etik ifadələr də işlədirmiş.
İlqar Abbasov öz müavini, millət vəkili Səttar Möhbalıyevin oğlu İsfəndiyar Möhbalıyevlə və birinci müavini İsmayıl Hüseynovla da problem yaşayıb. Bir müddət əvvəl İlqar Abbasovla İsfəndiyar Möhbalıyev arasındakı münaqişə sakitləşib.
Xatırladaq ki, İsmayıl Hüseynov cəmi 9 gün əvvəl – oktyabrın 15-də vəzifəsindən azad edilib.
