Fələstinin HƏMAS hərəkatı İsraildən məhbus və girovların azad edilməsi ilə bağlı mümkün razılıq çərçivəsində hərəkatın Qəzzadakı keçmiş lideri Yəhya Sinvar və qardaşı Məhəmmədin cəsədlərinin qaytarılmasını tələb edib.
Yeniera.az xəbər verir ki, bu barədə məlumatı hərəkata yaxın “Maan” agentliyi yayıb.
Bildirilib ki, HƏMAS nümayəndələri Misirdə baş tutan məsləhətləşmələr zamanı bu tələbi irəli sürüblər.
İsrail tərəfi isə son zamanlara qədər Yəhya Sinvarı “terrorizmin simvolları”ndan biri adlandıraraq onun cəsədinin qaytarılmasından imtina edib.
Qeyd edək ki, Y.Sinvar 2017-ci ildən Qəzza zolağında HƏMAS-a rəhbərlik edib, 2024-cü ilin avqustunda isə hərəkatın lideri İsmayıl Haniyənin Tehranda öldürülməsindən sonra HƏMAS-ın Siyasi Bürosunun rəhbəri təyin edilib. Sinvar ötən ilin oktyabrında Qəzzanın cənubunda İsrail hərbçiləri tərəfindən öldürülüb. Onun qardaşı Məhəmməd isə may ayında zərərsizləşdirilib. Həmin dövrdə Y.Sinvarın ölümündən bir neçə dəqiqə öncəki görüntüləri internetə sızdırılmışdı.
