Bir sıra məktəblərdə səhər saatlarında Dövlət Himni güclü səs ilə ifa olunur, bəzən isə onun yerinə motivasiya və vətənpərvərlik mahnıları səslənir. Bu vəziyyət yaxınlıqda yaşayan sakinlər üçün narahatçılıq yaradır. Səhər tezdən yüksək səslə musiqi yayılması xüsusilə yaşlıların və uşaqların istirahətini poza bilər.
Mövzu ilə bağlı Yeniera.az-a açıqlama verən təhsil eksperti İlham Əhmədov bildirdi ki, ümumiyyətlə, səhər himn oxunması yaxşı bir haldır və ənənədir:
“Buna heç kəs etiraz etməz, yəqin ki, hətta ətrafda yaşayanlar da razıdır. Amma səhər tezdən musiqinin yüksək səslə verilməsi artıq ekoloji bir problemdir; yəni səs ekosistemi pozulur, sakitlik pozulur, insanların istirahətinə və digər məsələlərə təsir göstərir.
Ona görə də, əgər səhər məktəbdə dərs başlamazdan əvvəl hansısa musiqi səsləndiriləcəksə, bu himn ola bilər. Başqa musiqilər həm yerində deyil, həm də ətrafda yaşayanların narahatlığına səbəb ola bilər”.
Yeganə Vəliyeva