ABŞ Hərbi Hava Qüvvələri qlobal təhlükəsizlik öhdəliklərini yerinə yetirmək üçün növbəti 10 ildə döyüş təyyarələrinin sayını təxminən 300-dək artırmağı planlaşdırır.
Yeniera.az xəbər verir ki, bu barədə Breaking Defence portalının Konqresə təqdim olunan plana istinadən yazdığı yazıda qeyd olunur.
Sənəddə bildirilir ki, Hərbi Hava Qüvvələri köhnə və beşinci nəsil qırıcıların modernləşdirilməsinə, döyüş qabiliyyətinin artırılmasına və yeni nəsil hava platformalarının əldə edilməsinə fokuslanıb.
Proqnozlara əsasən, 2026-cı maliyyə ilində ABŞ-nin qırıcı parkında 1271 təyyarə olacaq, lakin mövcud təhlükələrə qarşı adekvat müdafiə üçün 1558 təyyarə tələb olunur. Bu məqsədlə F-15EX və F-35 qırıcılarının daha çox alınması nəzərdə tutulur.
Lakin hesabatda bildirilir ki, maliyyə çatışmazlığı səbəbindən bu sifarişlərin tam icrası sual altındadır. Boeing şirkəti ildə 24 ədəd F-15EX istehsal edə bilir və əlavə maliyyələşmə ilə bu rəqəmi 36-ya qədər artırmaq mümkündür.
Bundan əlavə, gələcək donanmaya altıncı nəsil F-47 qırıcıları və pilotlu təyyarələri dəstəkləyəcək müasir döyüş dronları daxil olacaq.
Gülnar Həmidova
