Son zamanlar həm ABŞ-nin, həm də Rusiyanın Çinə artan marağının əsas səbəbləri nədir?
Bu maraq daha çox siyasi, yoxsa iqtisadi amillərlə bağlıdır?
Sualımızı cavablandıran millət vəkili Vüqar Bayramov Yeniera.az-a açıqlamasında bildirib ki, Çin dünyanın qlobal güclərindən biridir və ölkənin iqtisadiyyatında artım tempi durmadan davam edir:
“Məsələn, 2024-cü ildə Çin iqtisadiyyatı 5 faiz artıb və bu, qlobal iqtisadi artımdan 3 faiz daha yüksək artım deməkdir. Eyni zamanda, 1989-2025-ci illərdə Çin iqtisadiyyatı 9 faizə yaxın artıb. Bu gün Çin dünyanın ikinci ən böyük iqtisadi gücüdür. Çin iqtisadi baxımdan hər ötən gün daha da böyüməkdədir. Sözsüz ki, digər ölkələr də Çinlə əməkdaşlığa daha çox can atırlar. Bu da Çin iqtisadiyyatının böyük olması və bu ölkənin qlobal proseslərə təsir imkanlarının artması ilə bağlıdır. Bu baxımdan ABŞ və digər aparıcı ölkələr də Çinlə əməkdaşlığı davam etdirməyə çalışırlar. Düzdür, ABŞ tərəfindən qarşılıqlı tariflərin tətbiq edilməsi ilə bağlı mütəmadi açıqlamalar olur, yəni daha yüksək tariflərin tətbiq edilməsi məsələləri gündəmə gəlir. Bütün bunlarla yanaşı təbii ki, Çin iqtisadi baxımdan kifayət qədər böyük gücə malik olan ölkələrdəndir. Ona görə də digər ölkələr Çinlə əməkdaşlığa maraqlıdırlar və gözlənilir ki, bu maraq növbəti dövrlərdə də davam edəcək”.
Ariz Həsənoğlu
