Türkiyə 2025-ci ilin ilk doqquz ayı ərzində 50 milyon ziyarətçi qəbul edib və turizmdən 50 milyard ABŞ dolları gəlir əldə edib.
Rəsmi məlumatlara əsasən, ilin üçüncü rübü üzrə açıqlanan nəticələrə görə, ölkə ötən ilin eyni dövrü ilə müqayisədə beynəlxalq turist sayını 1,6 faiz artırıb. Turizm gəlirlərində isə 5,7 faizlik artım qeydə alınıb.
Birləşmiş Millətlər Təşkilatının Turizm üzrə Agentliyinin (UN Tourism) 2024-cü il məlumatlarına əsasən, dünyanın dördüncü ən böyük turizm bazarına malik olan Türkiyə, ilin ilk doqquz ayına dair göstəricilərini İstanbulda keçirilən mətbuat konfransında təqdim edib. Aralıq dənizi turizminin əsas mərkəzlərindən sayılan ölkə həm ziyarətçi sayında, həm də turizm gəlirlərində nəzərəçarpacaq artım nümayiş etdirib.
Türkiyə Respublikasının mədəniyyət və turizm naziri Mehmet Nuri Ersoy 2025-ci ilin ilk doqquz ayı üzrə göstəriciləri açıqlayıb. Nazir bildirib ki, bu dövrdə ölkəyə 50 milyon beynəlxalq turist səfər edib ki, bu da ötən ilin eyni dövrü ilə müqayisədə 1,6 faiz artım deməkdir.
Turizm gəlirləri də ötən illə müqayisədə 5,7 faiz artaraq 50 milyard ABŞ dollarına çatıb. Rəsmi rəqəmlərə əsasən, xarici turistlər bu dövrdə Türkiyədə orta hesabla 10,3 gecə qalıb və adambaşına gecəlik orta xərcləri 103 ABŞ dolları təşkil edib. Bu göstərici ötən illə müqayisədə 7 faizlik artım deməkdir.
Türkiyə Respublikasının mədəniyyət və turizm naziri Mehmet Nuri Ersoy bildirib ki, 2025-ci ilin ilk doqquz ayı region üçün ciddi çətinliklərlə yadda qalıb. Onun sözlərinə görə, bu dövrdə həm regional münaqişələrin, həm də iqlim dəyişikliyi nəticəsində yaranan mövsümi dəyişikliklərin təsirləri müşahidə olunub.
“Bütün bu amillərə baxmayaraq, həyata keçirdiyimiz strategiya sayəsində ötən illə müqayisədə gəlirlərimizi 5,7 faiz artıraraq 50 milyard ABŞ dollarına çatdırdıq. Bu, tariximizdə ilk dəfədir ki, üçüncü rübün sonunda 50 milyard dollar həddini keçirik. İlin sonuna qədər isə hədəfimiz 64 milyard dollarlıq gəlir əldə etməkdir”, – deyə nazir vurğulayıb.
Cari ilin ilk doqquz ayı ərzində Türkiyəyə ən çox turist göndərən üç ölkə Rusiya Federasiyası (5,53 milyon nəfər), Almaniya (5,22 milyon nəfər) və Birləşmiş Krallıq (3,54 milyon nəfər) olub.
