Azərbaycan və Gürcüstan üzərindən Rusiya ilə Ermənistan arasında dəmir yolu xəttinin açılması Cənubi Qafqazda sülhün bərqərar olmasına əsl töhfədir.
Yeniera.az xəbər verir ki, bunu Rusiya baş nazirinin müavini Aleksey Overçuk jurnalistlərə bildirib.
“Biz Rusiya ilə Ermənistan arasında Azərbaycan və Gürcüstan vasitəsilə dəmir yolu əlaqəsinin başlanmasını alqışlayırıq. Ermənistan müstəqillik əldə etdikdən sonra ilk dəfədir ki, ölkələrimiz arasında birbaşa dəmir yolu əlaqəsi yaradılıb. Bu, Cənubi Qafqazda sülh quruculuğuna real, nəzərəçarpacaq töhfədir və regional sabitliyin və regionun bütün ölkələrinin iqtisadi inkişafına kömək etmək üçün səylərimizi nümayiş etdirir”, – Overçuk qeyd edib.
Onun sözlərinə görə, marşrutun istifadəyə verilməsi Avrasiya İqtisadi İttifaqı (Aİİ) daxilində bazarın əlçatanlığını da artıracaq və regionda nəqliyyat əlaqələrini gücləndirəcək. “Yeni marşrut Rusiyanın Cənubi Qafqaz ölkələri ilə əlaqəsini gücləndirir, Aİİ-nin digər üzv ölkələrinin malları üçün Ermənistan bazarlarına çıxışı artırır və erməni istehsalçılarının Aİİ bazarlarına çıxışını yaxşılaşdırır”, – o vurğulayıb.
Rza Əli
