Avtomobil mütəxəssisləri sürücülərə yay aylarında Aİ-95 benzininə keçməyi məsləhət görürlər. Qayda və tövsiyələrə uyğun davranan və avtomobilinin uzunömürlülüyünə çalışan sürücülər buna əməl etsələr də, çoxları bu tövsiyənin əsl mahiyyətini bilmir.
Belə ki, yayın yüksək temperaturu avtomobillərdə mühərrikin daha çox yüklənməsinə səbəb olur. Bu səbəbdən avtomobilin stabil və təhlükəsiz işləməsi üçün keyfiyyətli yanacaq seçimi xüsusi əhəmiyyət daşıyır.
Yeniera.az xəbər verir ki, Avtomobil üzrə mütəxəssis Seymur Nağıyevin Bizim.Media-ya verdiyi məlumata görə, 95 oktan benzin yüksək yanma keyfiyyətinə görə mühərriki isti havalarda daha effektiv qoruyur:
“Xüsusilə mühərrikin qızmasının qarşısının alınmasında 95 oktanlı benzin daha güclüdür. Çünki isti havada mühərrik daha çox qızır, yanacaq-hava qarışığının öz-özünə alışma riski artır. 95 markalı benzində oktan daha yüksək olduğuna görə sıxılmaya və istiliyə qarşı daha dayanıqlıdır. Xüsusilə turbo mühərriklərdə daha çox tövsiyə olunur.
Bundan başqa uzun məsafədə maşın sürənlər kondisioneri daimi işlətməli olurlar. Bu da mühərriki ikiqat yükləyir. Ona görə də 95 benzini mühərrikin daha təhlükəsiz işləməsinə kömək edir”.
Məsələ burasındadır ki, mütəxəssislərin bu tövsiyələrinə bütün sürücülər əməl etsə, 95 oktanlı benzinə tələbat da artacaq.
Bu “kütləvi keçid” defisit yarada bilərmi?
Mütəxəssis bildirir ki, tələbat çoxluğu adətən qısa müddətli çatışmazlıq yarada bilər, bəzi yanacaqdoldurma məntəqələrində müvəqqəti növbə yaranar, uzunmüddətli ciddi defisit müşahidə olunmur. Çünki bazarda əsas tələbat hələ də Aİ-92-yədir.