Rusiyada Haval, Chery, Geely, Changan, Exeed, Omoda və Jetour kimi Çin avtomobillərinin sahibləri mühərrik və yanacaq sistemlərində yaranan nasazlıqlar səbəbindən avtomobillərini kütləvi şəkildə servislərə aparmağa başlayıblar.
Yeniera.az xəbər verir ki, bu barədə “Mash” teleqram kanalı məlumat yayıb.
Teleqram kanalının iddiasına görə, problemin əsas səbəbi çin avtomobillərinin yüksək keyfiyyətli, “Avro-5” standartına uyğun benzinlə işləmək üçün nəzərdə tutulmasıdır.
Rusiya hakimiyyəti isə ölkənin neft emalı zavodlarına dron hücumları nəticəsində yaranan yanacaq böhranı fonunda “Avro-2” standartlı benzinin istehsalına icazə verib.
Rusiyada əvvəllər istifadəsi qadağan edilmiş “Avro-2” benzində kükürdün miqdarı “Avro-5” yanacağı ilə müqayisədə 50 dəfəyə qədər çox ola bilər.
“Avro-2” səviyyəli yanacaqdan istifadə edən Rusiya vətəndaşları müasir Çin avtomobillərinin mühərriklərindəki forsunkaların kütləvi şəkildə sıradan çıxması, həmçinin yüksək təzyiqli yanacaq nasosları və şamların xarab olması ilə üzləşiblər. Nəticədə avtomobilin sensorları mühərrikdə nasazlıq olduğunu göstərir, dartı gücü azalır, mühərrikin işə salınması çətinləşir və yanacaq sərfiyyatı artır.
Buna baxmayaraq, bəzi avtomobil sahibləri problemdən xəbərsiz olduqları üçün aşağı keyfiyyətli yanacaq doldurmağa davam edir və nəticədə avtomobillərinə daha ciddi ziyan vururlar.
“Mash”ın məlumatına görə, son vaxtlar bu səbəbdən avtoservislərə müraciətlərin sayı həftədə 1-2-dən 7-10-a qədər artıb.
Təmirə təxminən 15 min rubl (təxminən 320 manat) xərclənir. Bəzi hallarda isə söhbət bahalı detalların tamamilə dəyişdirilməsindən gedir.
Rusiya Energetika Nazirliyi avqustun 5-də ölkə hökumətinin 2013-cü ildə qadağan edilmiş və bir kiloqram yanacaqda 500 milliqrama qədər kükürd ehtiva edən “Avro-2” benzininin istehsalına və ölkəyə idxalına icazə verdiyini açıqlayıb.
Bu icazə 2027-ci il iyulun 1-dək qüvvədə olacaq. Qərarın məqsədi “daxili bazarın avtomobil yanacağı ilə sabit təminatını və mümkün yanacaq qıtlığının qarşısının alınmasını” təmin etməkdir.
Belə benzində benzol da daxil olmaqla aromatik karbohidrogenlərin miqdarı normallaşdırılmır. Bundan başqa, əksər ölkələrdə yüksək toksikliyi və xərçəng riskləri səbəbindən istifadəsi qadağan edilən oktan artırıcı əlavə – monometilanilin (MMA) tətbiqinə də icazə verilir.
Ekspertlərin sözlərinə görə, “Avro-2” benzinində yüksək miqdarda olan kükürd silindr-porşen qrupuna, yanacaq avadanlıqlarına, mühərrik yağına, şamlara, klapanlara və forsunkalara, eləcə də katalitik neytrallaşdırıcıya zərər vurur.///Musavat.com