Putin və ABŞ-nin xüsusi nümayəndəsi Stiv Vitkoff arasındakı Moskva görüşü Ukrayna böhranının gedişatına hansı təsirləri yarada bilər? Bu görüş münaqişənin yumşalması üçün real diplomatik siqnal kimi dəyərləndirilə bilərmi?
ABŞ və Rusiyanın Ukrayna məsələsində mövqeləri nəzərə alınsa, tərəflər bu danışıqlarda hansı güzəştlər və ya yeni şərtlər üzərində dayanmış ola bilər? Bu, münaqişənin gələcək dinamikasını necə dəyişdirə bilər?
Politoloq Məhəmməd Əsədullazadə Yeniera.az-a açıqlamasında bildirib ki, Rusiya tərəfi hələ öz mövqeyində qalır.
Onun sözlərinə görə, danışıqlarda pozitiv məqamlar olsa da, hələ ciddi irəliləyişlər yoxdur:
“Müharibə davam edir. Buna baxmayaraq ABŞ-Rusiya arasında danışıqlar gedir.
Rusiya Aİ-ni prosesdən kənarlaşdırmaq istəyir. Lakin məsələ Avropasız həll olunmayacaq. Avropa ilə ABŞ arasında da müəyyən fikir ayrılıqlar var. Buna baxmayaraq ki, Aİ də kifayət qədər güclənir. Fikrimcə, danışıqlarda əsas güzəştə gedən Rusiya olmalıdır. Çünki konkret olaraq atəşkəs təmin olunmalıdır və sonra danışıqlar başlamalıdır. Avropanın da istəyi bu idi. Amerika da bu şərtlərlə razılaşıb. Amma Rusiya prezidenti atəşkəsə getmək istəmir. Rusiyanın tələbləri, fövqəl dövlət status əldə etməkdən ibarətdir. Vitkoffun səfəri və Amerika-Rusiya arasındakı danışıqlar müsbət nəticələnməyəcək. Yalnız Rusiyanın müəyyən güzəştlər gedəcəyi halda müsbət nəticələr ola bilər. ABŞ Rusiyanı buna məcbur etmək üçün ilk növbədə Ukrayanaya öldürücü silahlar verməlidir. Nə qədər ki bu silahlar verilməyib, Amerika və Ukrayna tərəfi burada zəif bənd olacaq”.
Ariz Həsənoğlu
