Türkiyə gələn il qlobal iqlim sammiti BMT-nin İqlim Dəyişmələri üzrə Çərçivə Konvensiyasının Tərəflər Konfransının 31-ci sessiyasını (COP31) qəbul edəcək, Avstraliya isə hökumətlərarası danışıqlara rəhbərlik edəcək.
Yeniera.az-ın “Reuters” agentliyinə istinadən verdiyi məlumata görə, bunu Avstraliyanın Baş naziri Entoni Albaneze “Australian Broadcasting Corp Radio”ya açıqlayıb.
Onun sözlərinə görə, tərəflər kompromisə gəliblər – Türkiyə COP31 sammitinə sədrlik edəcək, “pre-COP” tədbirləri Sakit okean regionunda keçiriləcək, Avstraliya isə hökumətlərarası danışıqlara rəhbərlik edəcək.
“Biz düşünürük ki, bu həm Avstraliya, həm də Türkiyə üçün böyük qələbədir”, – o bildirib.
Agentlik, həmçinin qeyd edir ki, Türkiyə COP31-i Antalya şəhərində keçirəcək.
Bu həftənin əvvəlində E.Albaneze bəyan edib ki, ölkəsi COP31-i Türkiyə ilə birgə keçirməyəcək.
Avstraliya və Türkiyə COP31-ə ev sahibliyi etmək üçün ərizələri hələ 2022-ci ildə təqdim ediblər və heç bir ölkə öz namizədliyini geri götürməyib, bu isə uzunmüddətli qeyri-müəyyənliyə səbəb olub.
BMT-nin qaydalarına görə, Avstraliya və Türkiyənin daxil olduğu “Qərbi Avropa və digər dövlətlər” (WEOG) qrupunun ölkələrinin yekdil razılığı tələb olunur. Əgər konsensus əldə olunmasa, ev sahibliyi hüququ avtomatik olaraq BMT-nin iqlim bölməsinin qərargahının yerləşdiyi Bonn şəhərinə (Almaniya) keçəcək. Lakin Almaniya hakimiyyəti artıq COP31-ə ev sahibliyi etməkdə maraqlı olmadığını bildirib.
