Paytaxtda və bölgələrdə hava şəraiti kəskin dəyişir. Milli Hidrometeorologiya Xidmətinin yaydığı məlumata görə, aprelin 4-ü səhər saatlarından etibarən Bakıda və Abşeron yarımadasında arabir yağış yağacaq.
Yeniera.az xəbər verir ki, yağıntıların bəzi yerlərdə intensivləşəcəyi, ayın 4-də isə qısamüddətli şimşək çaxacağı ehtimal edilir. Güclü yağışlar səbəbindən şəhərətrafı ərazilərdə subasma təhlükəsi yarana bilər.
Rayonlarda da qeyri-sabit hava şəraiti hökm sürəcək. Aprelin 4-dən başlayaraq ölkənin qərb rayonlarından keçən yağıntılı hava dalğası bütün respublikanı əhatə edəcək. Bəzi şərq rayonlarında yağışın güclü olacağı, dağlıq ərazilərdə qar yağacağı və dolu düşəcəyi gözlənilir. Proses ayın 7-si səhərədək davam edəcək.
Yağıntılı hava çaylarda sululuğu artıracaq. Xüsusilə Quba-Qusar bölgəsinin dağ çaylarında qısamüddətli daşqın və sel hadisələrinin baş vermə ehtimalı var. Aprelin 7-si və 8-də havada qısa fasilə yaransa da, ayın 9-dan etibarən yenidən yağıntılı şərait bərpa olunacaq. Aprel ayının ilk ongünlüyü ölkə ərazisində ümumilikdə dəyişkən və yağışlı keçəcək.