Stenford Universitetinin alimləri ilk dəfə nümayiş etdirdilər ki, daxili nitqi – “özümüzə danışdığımız” düşüncələri deşifrə etmək mümkündür.
Yeniera.az xəbər verir ki, tədqiqat “Cell” jurnalında dərc olunub.
Texnologiya sinir fəaliyyətini tutan və onu mətnə çevirən beyin-kompüter interfeysinə əsaslanır. Tədqiqat ALS və ya beyin sapı insultunun səbəb olduğu ağır iflic olan dörd nəfəri əhatə edib. Onların nitqi idarə edən korteksə mikroelektrod massivləri implantasiya edilmişdi.
İştirakçılar sözləri tələffüz etməyə cəhd etdikdə və ya sadəcə onları zehni olaraq danışanda sistem sinir fəaliyyətini təhlil edib. Məlum olub ki, daxili nitq beynin şifahi nitqlə eyni sahələrini aktivləşdirir, lakin siqnallar daha zəifdir. Alimlər süni intellektdən istifadə edərək xəyali sözləri və bütöv cümlələri 74%-ə qədər dəqiqliklə deşifrə edə biliblər.
Sistem həm də kortəbii düşüncələri tanıyırdı: məsələn, ekranda dairələri zehni olaraq sayarkən alqoritm rəqəmlər ardıcıllığını deşifrə etdi. Tədqiqatın müəlliflərindən biri Benjamin Meschede-Krasa qeyd edib:
“Əgər siz onları tələffüz etməyə çalışmaq əvəzinə sözlər üzərində düşünmək məcburiyyətindəsinizsə, bu, nitq qüsuru olan insanlar üçün potensial olaraq daha sürətli və daha əlverişlidir”.
Məxfiliyi qorumaq üçün tərtibatçılar sistemi yalnız konkret zehni ifadə ilə aktivləşdirən parol tətbiq ediblər. Təcrübə göstərdi ki, zehni parol 98%-dən çox dəqiqliklə tanınır.
Texnologiya praktiki tətbiqdən hələ də uzaq olsa da, elm adamları hesab edirlər ki, o, gələcəkdə ciddi nitq qüsurları olan insanlara adi söhbətdəki kimi, demək olar ki, sərbəst ünsiyyət qurmağa imkan verəcək.
Yeganə
