Euromonitor International tərəfindən dərc edilən “Top 100 City Destinations Index 2025” hesabatına əsasən, İstanbul və Antalya, dünyanın ən çox xarici turist cəlb edən ilk 10 şəhəri sırasında yer alıb.
Yeniera.az xəbər verir ki, hesabatda, Türkiyənin həm ziyarətçi sayına, həm də turizm cəlbediciliyinə görə qlobal liqada üst sıralarda mövqeyini qoruduğu bildirilir.
İstanbul, 19,7 milyon xarici turist ilə dünyanın 5-ci ən çox ziyarət edilən şəhəri, Antalya isə 18,6 milyon turist ilə 8-ci sırada qərarlaşıb. Beləliklə, Türkiyə dünyada iki şəhəri ilə ilk 10-luqda yer alaraq turizm sahəsindəki təsirini daha da gücləndirib.
Hesabatda, Banqkok 30,3 milyon turist ilə siyahıya başçılıq edərkən, ilk dördlükdə Honq Konq, London və Makao da yer alır. Ancaq Türkiyənin əldə etdiyi nəticələr, xüsusilə Avropa və Aralıq dənizi regionlarında turizm həcminin sürətlə artması ilə diqqət çəkir.
İstanbulun qastronomiyadan mədəniyyət və incəsənət tədbirlərinə, beynəlxalq təşkilatların fəaliyyətindən rəqəmsal tanıtım effektlərinə qədər geniş bir sahədəki dinamizmi, Antalyanın isə mövsüm boyu yüksək tələbat görən turizm infrastrukturu, idman turizmi və dünya səviyyəli obyektləri bu yüksəlişi dəstəkləyib.
Euromonitor International-ın yayımladığı indekse əsasən, Türkiyə, 2025-ci ildə turizm sahəsində ən sürətli böyüyən ölkələr arasında yer alacaq. İstanbul və Antalyanın ilk 10-luqda yer alması, Türkiyənin mədəniyyət, tədbir və destinasiya idarəetmə siyasətlərinin beynəlxalq miqyasda yüksək reaksiya aldığını göstərir.
2025-ci ilin nəticələri ilə Türkiyə yalnız turist sayını artırmaqla qalmayıb, həm də qlobal turizm rəqabətində sabit bir marka gücü yaratmağa müvəffəq olub. Bu, ölkənin turizm sahəsindəki nüfuzunun artması və dünya səviyyəsindəki mövqeyini möhkəmləndirməsi ilə nəticələnib.
