“Azərbaycan və İtaliya münasibətləri son illərdə strateji tərəfdaşlıq səviyyəsinə yüksələrək, qarşılıqlı etimad və uzunmüddətli əməkdaşlıq prinsipləri üzərində qurulub. Bu əlaqələrin mərkəzində həm siyasi dialoq, həm də enerji, iqtisadiyyat, mədəniyyət və təhsil sahələrində çoxşaxəli əməkdaşlıq dayanır. İtaliya Azərbaycanın ən iri ticarət tərəfdaşlarından biridir və xüsusilə enerji sektorunda SOCAR və İtaliya şirkətləri arasında qurulan əməkdaşlıq bu münasibətlərin əsas dayağını təşkil edir. Azərbaycan qazının Cənub Qaz Dəhlizi və Trans-Adriatik boru kəməri vasitəsilə Avropaya, xüsusilə də İtaliyaya çatdırılması, iki ölkə arasında qarşılıqlı asılılığı və strateji önəmi artırır”.
Bu fikirləri Yeniera.az-a açıqlamasında Milli Məclisin deputatı Elçin Mirzəbəyli deyib.
O bildirib ki, İtaliya Prezidentinin Bakıya səfəri münasibətlərin daha da möhkəmləndirilməsi kimi dəyərləndirilə bilər:
“İtaliya Prezidentinin Bakıya rəsmi səfəri bu münasibətlərin daha da möhkəmləndirilməsi baxımından yeni mərhələ kimi dəyərləndirilə bilər. Səfər həmçinin Azərbaycanın Avropa İttifaqı ilə münasibətlərində mühüm bir körpü rolunu oynaya bilər. Çünki İtaliya yalnız enerji idxalçısı deyil, həm də Avropa siyasətində Azərbaycanın maraqlarını anlayan və dəstəkləyən əsas dövlətlərdən biridir.
Səfərin diqqət çəkən mühüm məqamlarından biri də İtaliya-Azərbaycan Universitetinin kampüsünün açılışıdır. Bu layihə təkcə təhsil əməkdaşlığı deyil, həm də mədəni inteqrasiya və bilik mübadiləsi baxımından strateji əhəmiyyət daşıyır. Bütövlükdə Universitetin yaradılması Azərbaycan gənclərinə Avropa standartlarına uyğun təhsil almaq, İtaliyanın qabaqcıl elmi-texniki təcrübəsindən faydalanmaq imkanı yaradacaq. Eyni zamanda, bu təşəbbüs iki ölkə arasında humanitar əlaqələri möhkəmləndirəcək, yeni elmi-tədqiqat platformaları və akademik mübadilə imkanları açacaq.
Ümumilikdə, Azərbaycan-İtaliya münasibətlərinin bu mərhələsi bir tərəfdən iqtisadi və enerji əməkdaşlığının dərinləşməsi, digər tərəfdən isə humanitar sferada yeni layihələrin işə düşməsi ilə xarakterizə olunur. İtaliya Prezidentinin Bakıya səfəri və universitetinin kampusunun açılışı gələcək illərdə bu münasibətlərin daha da genişlənəcəyini göstərir”.
Mikayıl Mirzəzadə
