NASA-nın “InSight” roverinin seysmik müşahidələri əsasında aparılan tədqiqatlar Marsın daxili quruluşunda qədim və nəhəng qaya parçalarının hələ də mövcud olduğunu üzə çıxarıb.
Yeniera.az xəbər verir ki, bu qaya blokları Günəş sisteminin formalaşmasının ilk dövrlərində baş vermiş kosmik toqquşmaların izləridir.
Böyük Britaniyanın Imperial College London universitetindən Dr. Konstantinos Charalambousun rəhbərlik etdiyi komanda səkkiz güclü marszəlzələsi və meteorit toqquşmasından əldə edilən məlumatları təhlil edib. Seysmik dalğaların yayılma modellərinə əsaslanaraq, alimlər Mars mantiyasında dörd kilometrə qədər uzanan nəhəng qaya bloklarının olduğunu müəyyən ediblər.
Tədqiqat göstərir ki, Mars Yerə bənzər şəkildə, Günəş sisteminin ilk 100 milyon ili ərzində güclü meteorit bombardmanına məruz qalıb. Bu toqquşmalar nəticəsində yaranmış maqma okeanları soyuduqdan sonra fərqli tərkibli qaya parçaları mantiyanın dərin qatlarına yerləşib.
Yer üzündə bu cür strukturlar plitə tektonikasının təsiri ilə zamanla yoxa çıxdığı halda, Marsın sabit və təkqatlı qabığı bu qədim izləri indiyədək qoruyub saxlayıb. Alimlər qeyd edirlər ki, Marsın daxilində qorunan bu geoloji heterojenliklər planetin təkamülü və geoloji keçmişi haqqında nadir məlumatlar verir.
Qeyd edək ki, tədqiqatın nəticələri nüfuzlu “Science” jurnalında dərc olunub.
Gülnar Həmidova
