ATƏT Minsk prosesinin və ona bağlı strukturların rəsmi olaraq bağlanması regionda münaqişə sonrası mərhələnin tamamlanması kimi qiymətləndirilə bilərmi? Bu qərarın Azərbaycan–Ermənistan münasibətlərinə, xüsusilə də sülh sazişinin davamlılığına və beynəlxalq vasitəçilik mexanizmlərinə təsiri necə ola bilər?
Sualımızı cavablandıran politoloq Tofiq Abbasov Yeniera.az-a açıqlamasında bildirib ki, Minsk qrupunun adı və fəaliyyəti diplomatiya tarixində özünü qara ləkə kimi təsdiqləyib:
“Minsk qrupu illər ərzində göstərdi ki, diplomatik fəaliyyət və vasitəçilik necə olmalı deyil. Çünki bu təşkilat siyasi “alver”lə məşğul idi. Onun əsas alətləri monipulyasiyalar, şantaj və özünəməxsus yalanlar idi. İlk gündən bu təşkilatı Qarabağ məsələsinin həllinə yox, həll olunamamasına yönəltmişdilər. İlk növbədə çalışdılar ki, ermənilərin maraqlarını reallaşdırsınlar. Bununla da Azərbaycan üçün dözülməz vəziyyət yaratsınlar. Lakin bu alınmadı. Çünki Azərbaycan onlarla bağlı öz yanaşmasını dəqiq müəyyən etmişdi. Ölkəmiz bilirdi ki, onlar ancaq monipulyasiya ilə məşğuldurlar. Minsk qrupu istəyinə çata bilmədi, Azərbaycan siyasi rəhbərliyi-Heydər Əliyev və İlham Əliyev çox gözəl anlayırdı ki, dünyada nələr baş verir”.
Politoloq qeyd edib, diplomatiya sahəsi son dərəcədə ciddi bir sahədir və onun təməlini qoyan məhz danışıqlar, məsləhətlər, hətta çəkişmələrdir:
“Gərək bu prosesin iştirakçıları qərəz nümayiş etdirməsinlər. Lakin biz bu sahədə Minsk qrupunun timaslında neqativ bir yanaşmanın şahidi olmuşuq. Minsk qrupu özləri üçün çox yaxşı sistem qurmuşdu, BMT-nin, Azərbaycanın, bəlkə də Ermənistanın maliyyə resurslarından istifadə edərək ziyafətlərdə olur, bütün tədbirlərdə masa başında otururdular. Ona görə də təşkilatın nə keçmiş zamanlarda xeyri olub, nə də indi ələ gələcək bir üstünlüklərə sahibdirlər”.
T.Abbasov qeyd edib ki, Minsk qrupunun sülh sazişinə heç bir təsiri olmadı:
“Bəzi halalrda Ermənistan təxribatlar edəndə onlar öz səslərini qaldırdılar, amma bunu da effektiv etmirdilər ki, Ermənistan bundan nəticə çıxartsın. Sülh prosesinin bütün üstün cəhətləri Azərbaycan diplomatiyasının qazandığı uğurlardır. Rəsmi Bakı sülh prosesinin son həddə çatdırılması üçün əlindən gələni edəcək”.
Ariz Həsənoğlu