Tarixi binada yaşayan 21 ailə təhlükə ilə üz-üzədir.
Yeniera.az Xəzər TV-yə istinadən xəbər verir ki, paytaxtın Nəsimi rayonunun Bəşir Səfəroğlu küçəsi, 150 ünvanında yaşayan sakinlər iddia edirlər ki, yaşadıqları binanın zirzəmisini bir şəxs alıb və orada tikinti-qazıntı işləri aparır. Bu da binanın bünovrəsinə, fasadına ciddi təsir edir.
Onlar deyirlər ki, zirzəmini alan şəxs İran vətəndaşıdır və zirzəmidə iaşə obyekti tikmək istəyir.
Sakinlər bildirirlər ki, təhlükəsizlik bir yana, rahatlıqları da qalmayıb. Belə ki, zirzəmini alan şəxs səs-küylə də onları narahat edir.
Şikayətçilər deyirlər ki, bir müddət əvvəl həmin şəxs binanın divarını da söküb. Məqsədi isə oradan özünə havalandırma pəncərəsi açmaq olub. Lakin həmin divar sakinlərin şikayətindən sonra bərpa edilib.
Zirzəmini alan şəxsi isə orada tapa bilmədik.
Ekspertlərin sözlərinə görə, qeyd olunan tikili tarixi bina olduğu üçün ora kənar müdaxilə qanunla qadağandır. İddialarla bağlı Nəsimi Rayon İcra Hakimiyyətindən isə bildirildi ki, məsələ araşdırılacaq.
