Ermənistanda başa çatan növbədənkənar parlament seçkilərinin rəsmi nəticələri ətrafında alovlanan kütləvi xalq etirazları və daxili siyasi xaos ölkənin keçmiş elitasını çarəsiz vəziyyətə salıb. Paytaxt İrəvanda vəziyyətin hər an nəzarətdən çıxa biləcəyi barədə xəbərlər gələrkən, revanşist qüvvələrin əsas simalarından biri barəsində sensasion məlumat yayılıb.
Yeniera.az xəbər verir ki, Ermənistanın ikinci prezidenti, müxalif blokun rəhbərlərindən olan Robert Köçaryan İrəvanın “Zvartnots” beynəlxalq hava limanından təcili şəkildə ölkəni tərk etmək istəyərkən hüquq-mühafizə orqanları tərəfindən saxlanılıb. Sərhəd-keçid məntəqəsində sabiq dövlət rəhbərinin sənədləri bloklanıb və onun ölkədən çıxışına qəti şəkildə icazə verilməyib.
İstintaq və təhlükəsizlik strukturları sabiq prezidentin saxlanılmasının hansı konkret hüquqi əsaslarla və cinayət işi ilə bağlı olduğu barədə hələlik rəsmi açıqlama verməkdən yayınırlar. Digər diqqətçəkən pərdəarxası məqam isə ondan ibarətdir ki, bu insidentdən cəmi bir neçə saat əvvəl Robert Köçaryanın rəsmi ofisi onun üç günlük müddətə xaricə yollanacağını bəyan etmişdi. Sabiq prezidentin komandası yaydığı bəyanatda bu qəfil səfərin guya tamamilə şəxsi xarakter daşıdığını iddia etsə də, Ermənistan mediası dərhal onun ölkədəki kritik siyasi vəziyyətdən və mümkün həbs dalğasından qaçmağa cəhd göstərdiyini ifşa edib.
Qeyd edək ki, son günlər Ermənistanda Nikol Paşinyanın qələbəsi ilə başa çatan parlament seçkilərinin yekun rəqəmləri ətrafında olduqca kritik siyasi və hərbi gərginlik müşahidə olunur. Mərkəzi Seçki Komissiyasının binasını mühasirəyə alan müxalifət qüvvələri səsvermənin kütləvi saxtalaşdırıldığını irəli sürərək ölkədə itaətsizlik hərəkatına başladıqlarını elan ediblər. Hakimiyyət orqanları isə seçki nəticələrinin tam qanuni olduğunu bildirərək, daxili sabitliyi pozmağa və dövlət çevrilişinə cəhd göstərən radikal müxalifət liderlərinə qarşı sərt tədbirlər görüləcəyi barədə xəbərdarlıq edib.///NOCOMMENT.az