ABŞ Prezidenti Donald Tramp Rusiya-Ukrayna münaqişəsi ilə bağlı maraqlı açıqlama verib.
Tramp hesab edir ki, Ukrayna revanş edərək hücumlara hazırlaşıb torpaqlarını Rusiyadan geri ala bilər.
Mövzu barədə fikirlərini Yeniera.az-la bölüşən siyasi şərhçi Tofiq Abbasov Trampın Rusiya-Ukrayna qarşıdurması ilə bağlı mövqeyinin tez-tez dəyişdiyini qeyd edib:
“Son dəyişiklik onun sentyabrda Londona səfərindən sonra baş verdi. Tramp bir növ Ukrayna ilə bağlı öz mövqeyini sərtləşdirdi. Əslində isə görürük ki, bu durumda daha çox canfəşanlıq edən Avropadır. Avropa istəyir ki, ABŞ Ukraynaya köməyini əsirgəməsin, əksinə, bu yardımı gücləndirsin və lazım olan məqamda “Tomoqavk” raketlərini Kiyevə versin”.
Politoloq vurğulayıb ki, Ukrayna revanş haqqında çox danışsa da, bunu etmək gücündə deyil:
“Çünki Rusiya həm böyük dövlətdir, resurs bazası zəngindir, həm də demoqrafik göstəriciləri üstündür. Fikrimcə, Tramp Putinlə görüşəndən sonra onlar arasında sövdələşmə olub, sadəcə ABŞ prezidenti bunu etiraf edə bilməz. Ona görə də bu danışıqlardan sonra Tramp söz verib ki, Ukraynaya strateji silahların verilməsinin qarşısını alacaq. Bunun müqabilində Rusiya da bəzi məqamlarda, xüsusilə, Yaxın Şərqdəki proseslərdə Amerikaya köməkliyini göstərir. Moskva İran-İsrail qarşıdurmasında daha çox İsrailə kömək edib. Baxmayaraq ki, Moskva və Tehran müttəfiq olduqlarını bildirirlər, əslində isə Tehranın Moskvaya o qədər də etimadı yoxdur”.
T.Abbasovun sözlərinə görə, ABŞ Ukraynanın əks hücuma keçməsində maraqlı deyil:
“Əksinə, Trampın mövqeyi odur ki, Rusiya bu qarşıdurmada Ukraynanı diz çökdürsün, sonra parçalasın. Ukraynanın əraziləri əvvəllər daha böyük idi, vaxtilə keçmiş Almaniya kansleri Angela Merkel demişdi ki, bizə bu böyüklükdə Ukrayna lazım deyil. Bir sözlə, oyunun qaydaları tez-tez dəyişilir, lakin əminəm ki, Tramp Aİ liderlərinin, o cümlədən Britaniya rəhbərinin mövqeyi ilə razı deyil ki, Rusiyanı sıxışdırsınlar və Ukraynaya yardım etsinlər. Amerika dəstək verməyəcək ki, Ukraynaya təşəbbüsü ələ keçirib Rusiyaya meydan oxusun. Proses bir qədər də uzanacaq və daha sonra Kiyev danışıqlara getməyə məcbur qalacaq”.
Yeganə Vəliyeva
