“Azərbaycan Prezidenti cənab İlham Əliyevin BMT-dəki çıxışını qısaca dəyərləndirməli olsaq, orada iki reallıq qabarıq görünürdü”.
Yeniera.az xəbər verir ki, bu fikirləri Milli Məclisin deputatı Sahib Alıyev İlham Əliyevin BTM-dəki çıxışına münasibət bildirərkən deyib.
O bildirib ki, İlham Əliyevin BMT-dəki çıxışını dəyərləndirsək, iki reallıqdan danışmaq olar:
“Onlardan biri budur ki, BMT həmin qurumdur, dəyişməyib, dəyişmir. Azərbaycan isə daha BMT-dən yardım uman, amma bunu görməyən ölkə deyil. Azərbaycan BMT-dən yardım umandan bu quruma kömək edənə, kağız üzərində qalan 4 qətnaməsini təkbaşına yerinə yetirənə, beynəlxalq hüququ hərbi cinayətkarların ayaqları altından qaldırıb başlarına çırpana, onun hələ də qüvvədə olduğunu göstərənə çevrilib”.
Deputatın fikrincə, BMT-də çıxış edən heç bir liderin İlham Əliyev qədər bu təşkilat qarşısında xidməti olmayıb:
“Ümumiyyətlə, mən bu fikirdəyəm ki, orada çıxış edənlərin arasında Azərbaycan Prezidenti qədər BMT qarşısında böyük xidməti olan ikinci bir lider yox idi. Beş il bundan öncəki çıxışıyla da o göstərmişdi ki, öz ölkəsinin maraqlarını təmin etmək baxımından həlledici anda bu qurumun kürsüsündən kimsə onun qədər uğurla faydalana bilməyib”.
Leyla Cəfərova
