“Azərbaycanın VII Avropa Siyasi Birliyi Sammitində iştirakı ölkəmizin qlobal və regional miqyasda artan nüfuzunun sübutudur. Ölkəmiz həm də geosiyasi vəziyyəti, coğrafi mövqeyi, strateji resursları, Avropa ilə Cənubi Qafqazı, eləcə də Mərkəzi Asiyanı birləşdirən körpü funksiyasını yerinə yetirir. Məhz Azərbaycanın bu sammitdə iştirakı mövqelərimizi daha da gücləndirəcək və regional inteqrasiya, eləcə də Avropa ilə daimi əməkdaşlıqda vacib aktor olduğunu göstərəcək”.
Bu fikirləri Yeniera.az-a açıqlamasında Milli Məclisin Müdafiə, Təhlükəsizlik və Korrupsiya ilə mübarizə komitəsinin sədri Arzu Nağıyev Prezident İlham Əliyevin “Avropa Siyasi Birliyi”nin 7-ci Zirvə toplantısında iştirakını şərh edərkən deyib.
O bildirib ki, Prezidentin bu sammitdə iştirakı həm iqtisadi, həm enerji, həm də nəqliyyat sahəsinə böyük töhfə verəcək:
“Sammit Azərbaycanın Avropa dövlətləri ilə əməkdaşlığında yeni perspektivlər açır. Cənab Prezidentin sammit çərçivəsindəki görüşləri ilk növbədə həm iqtisadi sahədə qarşılıqlı investisiya imkanlarının genişlənməsinə, eyni zamanda enerji sahəsində Cənubi Qaz dəhlizinin gücləndirilməsinə, bərpaolunan enerji layihələrinin inkişafına böyük töhfə verəcək. Nəqliyyat baxımından, Trans-Xəzər dəhlizinin Avropa ilə uzlaşdırılması, logistika mərkəzi kimi Azərbaycanın rolunu daha da artırır. Bu ölkəni Avropa üçün etibarlı tranzit tərəfdaşına çevirir. Azərbaycanın beynəlxalq imici daha da möhkəmlənir. Belə platformada iştirak təkcə iqtisadi və enerji əməkdaşlığı ilə məhdudlaşmır. Avropa siyasi dairələrində ölkəmiz yalnız enerji təmsilçisi kimi deyil, həm də regionda sülhün, sabitliyin və təhlükəsizliyin bərqərar olmasına zəmin yaradan tərəfdaş kimi qəbul edilir. Bu, qlobal təhlükəsizlik gündəliyində fəal iştiraka şərait yaradır. Təbii ki, strateji baxımdan, Avropa Siyasi Birliyi kimi platformalarda təmsil edilmək Azərbaycan üçün birbaşa diplomatik kanalların açılması deməkdir. İstər enerji, istər nəqliyyat, istərsə də təhlükəsizlik sahəsində ölkəmiz mövqelərini vasitəçisiz ifadə edə bilir və bu məsələləri Avropa liderlərinə təqdim etmək imkanı qazanır. Bu da Rəsmi Bakının balanslaşdırılmış xarici siyasət kursuna və beynəlxalq nüfuzun artmasına xidmət edir. Bu reallıqlar cənab Prezident İlham Əliyevin rəhbərliyi altında keçirilən daxili və xarici siyasətin müstəqil olduğunun bariz nümunəsidir”.
Mikayıl Mirzəzadə