“Son illərdə Azərbaycan-Fransa münasibətləri bir sıra gərginliklər, qarşılıqlı ittihamlar və diplomatik böhranlarla yadda qalıb. Parisin Ermənistanı açıq şəkildə dəstəkləməsi və birtərəfli mövqeyi ölkələr arasında inamsızlıq yaradıb. Lakin regionda dəyişən geosiyasi reallıqlar, yeni əməkdaşlıq imkanları və tərəflərin qarşılıqlı maraqları bu münasibətlərin gələcəyi barədə suallar doğurur”.
Məhz bu mövzu ətrafında Milli Məclisin deputatı Ceyhun Məmmədov Yeniera.az-a açıqlamasında diqqətçəkən məqamlara toxunub.
O bildirib ki, Paris uzun illər ərzində ölkəmizə qarşı ədalətsiz və birtərəfli siyasəti ilə seçilib:
“Fransa hər zaman bizə qarşı ədalətsiz və qərəzli siyasəti ilə seçilib. Tarixi proseslər göstərir ki, Paris bu məsələlərdə daim Ermənistanın tərəfində dayanıb və mövqeyini tərəfli şəkildə qoruyub”.
Deputat qeyd edib ki, son günlər fərqli mənzərə müşahidə olunur və Fransa münasibətləri bərpa etməyə, yeni dialoq qurmağa cəhd göstərir:
“Son günlər isə biz fərqli mənzərəni müşahidə edirik. Fransa Azərbaycanla yaxınlaşmağa, münasibətləri bərpa etməyə və yeni dialoq qurmağa cəhd göstərir. Bu, xüsusilə Fransa Prezidentinin Azərbaycan Prezidenti ilə görüş istəyi və bu istiqamətdə atdığı addımlarda özünü aydın göstərir”.
C.Məmmədov əlavə edib ki, münasibətlərin gələcəyi Ermənistanın davranışından və Fransanın mövcud siyasətini dəyişib-dəyişməyəcəyindən asılı olacaq:
“Əgər Ermənistan təcavüzkar siyasətini davam etdirərsə və Fransa yenidən qərəzli mövqe sərgiləyərsə, münasibətlərdə heç bir perspektivdən danışmaq mümkün olmayacaq. Lakin əksinə, Fransa ədalətsizliyə və qərəzə son qoyarsa, balanslı siyasət yürüdərsə, o zaman tərəflər arasında münasibətlərin inkişafından və gələcək perspektivlərdən bəhs etmək olar”.
Deputat sonda vurğulayıb ki, Azərbaycanın mövqeyi aydındır – qarşılıqlı hörmət və ədalət prinsiplərinə əsaslanan siyasət qurulmalıdır. Fransa isə çalışmalıdır ki, illərdir davam edən birtərəfli mövqeyinə son versin və münasibətlərin sağlam əsasda inkişafına şərait yaratsın.
Yeganə