“Türk Dövlətləri Təşkilatı” (TDT) Dövlət Başçılarının Qəbələdə keçirilən 12-ci Zirvə görüşü mühüm və tarixi hadisələrlə yadda qaldı”.
Bu sözləri Yeniera.az-a açıqlamasında Milli Məclisin deputatı Hikmət Babaoğlu deyib.
Deputat qeyd edib ki, sözügedən Zirvə Görüşündə yaddaqalan mühüm hadisələrdən biri ilk növbədə “TDT+” formatının yaradılması oldu:
“Bu formatın yaradılması TDT-nin inkişaf perspektivləri ilə bağlı mühüm bir qərar idi. Çünki TDT-nin 2021-ci ildə qəbul olunmuş nizamnaməsində bu təşkilat dil və etnik qohumluq əsasında fəaliyyət göstərən bir təşkilatdır. Amma dil və etnik baxımından uyğun olmayan, lakin TDT ilə əməkdaşlıq etmək istəyən çoxsaylı qonşu dövlətlər və beynəlxalq təşkilatlar var. Təbii ki, bu da TDT-jin inkişafı və güclənməsi üçün lazımdır. Ona görə də belə bir formatın qəbul olunması tarixi bir hadisə kimi yadda qalacaq”.
O bildirib ki, Azərbaycan Prezidentinin 2026-cı ildə TDT-nin birgə hərbi təlim keçməsi ilə bağlı təklifi də olduqca mühüm və tarixidir:
“Qəbələdəki Zirvə görüşündə gündəm sülh və təhlükəsizlik idi. Ancaq məlumdur ki, sülh və təhlükəsizliyi hərbi-siyasi güc olmadan təmin etmək mümkün deyil. Azərbaycan bunu öz təcrübəsində həyata keçirib, güclü olmaqla təhlükəsizliyini təmin edib. Fikrimcə, bütün bunlar TDT-nin də gələcək perspektivləri baxımından yeni imkanlar yaradacaq”.
Yeganə Vəliyeva