Son illərdə aparılan xarici tədqiqatlar göstərir ki, gecə saatlarında – xüsusilə də yatmazdan əvvəl az miqdarda su içmək bədən sağlamlığı və yuxu keyfiyyəti baxımından bir sıra faydalar verir.
Yeniera.az xəbər verir ki, ABŞ-nin Cleveland Clinic tibb mərkəzi və Sleep Foundation təşkilatlarının apardığı araşdırmalara əsasən, orqanizmin gecə saatlarında da suya ehtiyacı var.
Gecə boyunca nəfəs alma, tərləmə və digər fizioloji proseslər nəticəsində bədən maye itirir. Bu itkini kompensasiya etmək üçün yatmazdan əvvəl az miqdarda su qəbul etmək, bədənin su balansını qorumağa kömək edir.
Tədqiqatçılar bildirirlər ki, susuz qalmaq yuxunun dərin mərhələlərinə keçidi çətinləşdirə, tez-tez oyanmalara səbəb ola bilər. Yatmazdan əvvəl su içən şəxslərdə isə daha səlis və fasiləsiz yuxu müşahidə olunub. Bu hal həm də səhərlər daha enerjili oyanmağa şərait yaradır.
Gecə su qəbulunun digər bir mühüm faydası isə böyrək funksiyalarına dəstək olmasıdır.
Mütəxəssislər qeyd edirlər ki, bədən gecə də toksinləri təmizləməyə davam edir və bu prosesdə su mühüm rol oynayır. Sidik yolları vasitəsilə zərərli maddələrin atılması, suyun köməyi ilə daha effektiv baş verir.
Bununla belə, mütəxəssislər gecə çox su içməyin də zərərli ola biləcəyini bildirirlər. Həddindən artıq su qəbul etmək “nocturia” adlanan hal – yəni gecə tez-tez sidiyə getmə ilə nəticələnə bilər ki, bu da yuxu pozğunluğuna səbəb olur. Bu səbəbdən tövsiyə olunur ki, yatmazdan 1-2 saat əvvəl maksimum bir stəkan su içilsin.
