“Bu limitin tətbiq edilməsi təxminən üç il vaxt aparacaq. Bir həftəyə, noyabrın 1-dən kimlərisə taksi sürücüsü olmaq hüququndan məhrum etməyəcəklər. Çünki bu gün taksi sürənlərin demək olar ki, hamısının sənədləri qaydasındadır, qeydiyyatdan keçiblər və onların sənədlərinin müddəti bitmədiyinə görə bu qadağanı tətbiq etmək olmaz”.
Bu fikirləri Yeniera.az-a açıqlamasında nəqliyyat eksperti Elməddin Muradlı Bakıda taksilərin sayının 25 minə endirilməsinə münasibət bildirərkən deyib.
Onun sözlərinə görə, bu qərara sosial məsələ kimi yanaşanda müəyyən çətinlik və problemlər yaradacağı ehtimal edilir:
“Növbəti dövrlərdə reqlament müəyyənləşdiriləcək, lisenziyalar, buraxılış kartları veriləcək. Belə olan halda təbii ki, 9 minə yaxın taksi sürücüsü kənarda qalır. Onların arasında bəziləri var ki, mütəmadi taksi sürmür, sadəcə sənədləri alıb, qaydasına salıb, yalnız həftəsonları taksi kimi fəaliyyətiylə məşğul olur. Təbii ki, şəhər nəqliyyatı prinsipindən yanaşanda doğru addımdır. Sosial məsələ kimi yanaşanda müəyyən çətinlik və problemlər yarada bilər”.
Ekspert hesab edir ki, bu qərar diqqətlə təhlil edilməlidir, yoxsabir çox insan işsiz qalacaq:
“Ona görə də mən düşünürəm ki, burada diqqətli təhlil aparılmalıdır, yanaşmalar fərqli ola bilər. Taksometrlərin bu gün aradan qaldırılmasına ehtiyac yoxdur. Bu, yalnız qiymət artımına gətirib çıxara bilər. Ola bilsin ki, bu qərarla ictimai nəqliyyat geniş şəkildə inkişaf etsin. Metro stansiyaları və avtobusların sayı artsın. Lakin onu da nəzərə almaq lazımdır ki, iki il öncə verilən qərarla 70 minə yaxın taksi sürücüsü yenidən sənədləşdirildi. İki il ərzində bu rəqəm gəlib 34 minə çatdı. Deyək ki, Bakı üçün 25 min normal rəqəmdir. Amma bir çox insanın işsiz qalması heç də yaxşı hal deyil. Düşünürəm ki, yaxşı işləyənlər, bu işə peşəkar formada yanaşanlar yenə də qalıb üzr istəyəcəklər”.
Ariz Həsənoğlu
