“Ramiz Mehdiyev çox təhlükəli adamdır. Düşünürəm ki, o, dərhal həbs olunmalıdır. Çünki istintaqın gedişatına təsir etmək, sübutları məhv etmək, eyni zamanda qaçıb gizlənmək imkanları var. Ona görə də mən ilk növbədə Mehdiyevin istintaq təcridxanasına salınmasının tərəfdarıyam”.
Bu fikirləri Yeniera.az-a açıqlamasında AĞ Partiya sədri Tural Abbaslı deyib.
Partiya sədri qeyd edib ki, çevriliş məsələsi tək nəfərlik iş deyil, Mehdiyevin sağı-solu, keçmiş kadrları araşdırılmalıdır:
“Bu dövlət çevrilişinə cəhd məsələsi bir adamlıq iş deyil. Ən azı bu adamın sağı, solu kim olub, kimlərlə hərəkət edib, prosesin içində olan sabiq vəzifəlilər var yoxsa hazırda vəzifədə olanlardan kimlərsə var tipli məsələləri sürətli şəkildə araşdırılmalıdır. Adamın barəsində üç gündür həbs-qətimkan tədbiri seçilib, amma hələ bu gün xəbər yayılır ki, Mehdiyev 7 saat istintaqda ifadə verib. Villasında oturaraq jurnalistə telefonla cavab verir. Hesab edirəm ki, cinayətkara cinayətkar kimi davranmalıdır, buna imtiyazlı şəxs kimi baxmaq olmaz. Bu baxımdan, onun digər tərəfdaşlarının da həbsini gözləyirik. Ümumiyyətlə, cəmiyyətə bir məlumat verilməsi lazımdır. Çünki müxtəlif təxribat xarakterli məlumatlar yayılır. Mehdiyev illərdir ki, ölkə daxilində böyük vəzifələrdə çalışıb və mümkündür ki, onun kadrları hələ də strateji vəzifələrini icra edirlər. İstisnasız müəyyən təhdidlər ola bilər”.