“Rusiya-Ukrayna münaqişəsinin dayandırılması ABŞ prezidenti Donald Trampın əsas hədəflərindən biridir”.
Bu fikirləri Yeniera.az-a açıqlamasında politoloq Tofiq Abbasov söyləyib.
Onun sözlərinə görə, Tramp hələ prezidentliyə qədər – seçki kampaniyasını aparanda deyirdi ki, müharibəni dayandıracaq:
“Lakin bu məsələnin öhdəsindən gəlmək o qədər də asan deyil. Faktiki olaraq, hazırda Tramp şahmat üsulundan istifadə edərək, atla gediş edib yenidən Türkiyəni gündəmə gətirir. Əlbəttə, Türkiyənin burada öz marağı var, Türkiyə həm Rusiya, həm də Ukrayna ilə strateji müttəfiqlik münasibətlərini qoruyur. Ərdoğan Ukrayna münaqişəsində az-çox dividend qazanmış siyasətçidir. Çünki Türkiyədə danışıqlar aparıldı, taxıl razılaşması əldə olundu. Məlumdur ki, Stiv Uitkoff Trampın şəxsi nümayəndəsi kimi prosesləri tənzimləyir”.
T.Abbasov qeyd edib ki, burada məsələyə daha çox münasibət bildirən Rusiyadır. Əgər Rusiyanı razı sala bilsələr, ola bilsin ki, məsələ həll müstəvisinə yol tapsın:
“Əlbəttə ki, müharibələrin hamısı yüngül formada başlasa da, sonra onların alovları yeni areallara keçir, ona görə də müharibələrin qarşısını almaq çox çətin məsələdir. Bu baxımdan Ukrayna-Rusiya münasibətləri də son dərəcədə gərgindir və bu gərginliyin də mənbələri Avropa qitəsindədir. Çünki burada Böyük Britaniya və Avropa İttifaqının barışmaz mövqeyi özünün mənfi rolunu oynayır. Onlar heç bir vəchlə istəmirlər ki, bu qarşıdırmada sabitlik yaransın və sülh yoluna çıxışlar tapılsın. Aİ və Britaniyanın burada öz maraqları var. Britaniya hazırda daha çox ABŞ ilə münasibətlərini qızğın bir tərzdə çözməyə çalışır. Çünki Vaşinqtonla London arasında daimi rəqabət var. Ona görə də Stiv Uitkoffdan çox şey asılı olacaq, təbii ki, o Trampdan öz təlimatların alıb və nə qədər dərin çeviklik nümayiş etdirsə də, bir o qədər işin xeyrinə olacaq. Bəlkə bu məsələdə Türkiyə variantı ən münasib və işlək bir mexanizmə çevriləcək. Hər bir halda Türkiyə bundan çəkinməyəcək, çünki Ərdoğanın da istəklərindən biri odur ki, onun imzası sülh proseslərində həkk olunsun”.
Ariz Həsənoğlu