8 il əvvəl tikilib istifadəyə verilmiş 15 mərtəbəli yaşayış kompleksinin mansartında yeni mənzil tikib, “Tik-Tok”da elan verdilər. 3 otaqdan ibarət yeni tikilinin qiyməti 125 min manata təklif edilib. Mənzilin 56 kvadrat metr olduğu da elan lövhəsinə yazılıb. Sözügedən mənzil Nəsimi rayonu Şamil Əzizbəyov küçəsi 133, Qış Parkının yaxınlığında yerləşən premium yaşayış kompleksində qeydə alınıb. Sakinlərdən bildirildi ki, “Seven Points” MTK tərəfindən inşa olunan yaşayış kompleksi pilot layihədir. Kompleksdə tikinti şirkəti tərəfindən ilkin satışların bitdiyini isə komendant söyləyib.
Maraqlıdır, 8 il bundan əvvəl tikilib istifadəyə verilən müasir yaşayış kompleksininin sonuncu mərtəbəsindəki yeni mərtəbə necə artırılıb?”
Paytaxtın mərkəzində ucalan premium sinfə məxsus binanın dam hissəsində aparılan bu qeyri-adi tikinti və onun sosial şəbəkələrdə açıq şəkildə satışa çıxarılması şəhərsalma qaydaları və bina sakinlərinin təhlükəsizliyi baxımından ciddi rezonans doğurub. İllər önçə təhvil verilmiş çoxmənzilli binanın konstruksiyasına kənar müdaxilə edilərək yeni yaşayış sahəsinin yaradılması həm hüquqi qanunsuzluq, həm də binanın yükdaşıma qabiliyyətinə birbaşa təhdid hesab olunur. Bu vəziyyət “8 il sonra belə bir tikintiyə necə göz yumulub və bu cür mənzilləri alan vətəndaşları hansı təhlükələr gözləyir?” suallarını aktuallaşdırıb.
Məsələ ilə bağlı NOCOMMENT.az-a danışan əmlak məsələləri üzrə ekspert Camal Abışov qeyd edib ki, 15 mərtəbəli binanın damında və ya mansartında sonradan mənzil tikilməsi tamamilə qanunsuzdur və heç bir dövlət qurumu bu cür özbaşına artırmalara rəsmi icazə verə bilməz: “Azərbaycan Respublikasının Şəhərsalma və Tikinti Məcəlləsinə, eləcə də Mənzil Məcəlləsinə əsasən, binanın damı, mansartı və zirzəmisi bütün bina sakinlərinin ümumi paylı mülkiyyəti hesab olunur. Tikinti şirkəti (MTK) və ya hər hansı bir şəxs sakinlərin 100 faizli yazılı razılığı olmadan damma bir mismar da vura bilməz. Belə bir tikintinin aparılması birmənalı olaraq özbaşına tikinti qrupuna daxildir və cinayət məsuliyyəti yaradır. Çox təəssüf ki, bəzi MTK-lar daxili satışı bitirdikdən sonra əlavə qazanc əldə etmək üçün qanunsuz yollarla dam hissələrini satır və ya orada qondarma mənzillər inşa edirlər. Fövqəladə Hallar Nazirliyi (FHN) və yerli icra hakimiyyəti orqanları bu cür hallara qarşı dərhal söküntü tədbirləri görməlidir, çünki bu artırma layihədən kənar olduğu üçün binanın seysmik dayanıqlığını təhlükə altına qoyur”.
Onun sözlərinə görə, vətəndaşlar ucuz qiymətə aldanaraq sosial şəbəkələrdə reklam olunan bu cür “tələ” mənzilləri alarkən gələcəkdə həm pullarını, həm də mülklərini itirmək riski ilə üz-üzədirlər: “125 min manata Qış Parkının yanında 3 otaqlı mənzil təklif olunması ilk baxışdan cəlbedici görünə bilər, amma reallıqda bu, hüquqi sabun köpüyüdür. Vətəndaşlar belə mənzilləri alanda bilməlidirlər ki, damda qanunsuz tikilən sahəyə heç bir zaman Əmlak Məsələləri Dövlət Xidməti tərəfindən çıxarış (kupça) verilməyəcək. Bu mənzillərin satışı yalnız MTK-nın daxili, qanunsuz müqaviləsi ilə həyata keçirilir. Sabah binaya dövlət komissiyası tərəfindən yekun sənədləşmə veriləndə və ya sakinlər məhkəməyə müraciət edəndə, o tikili dərhal söküləcək və alıcı ortada qalacaq. İnsanlar bina mənzili alarkən mütləq binanın təsdiq olunmuş ilkin memarlıq layihəsini tələb etməli, həmin mənzilin layihədə yaşayış sahəsi kimi qeyd olunub-olunmadığını yoxlamalıdırlar. Əgər sənəddə ora dam və ya texniki mərtəbə kimi keçirsə, həmin mülkdən uzaq durmaq lazımdır. Ucuz ətin şorbası olmadığı kimi, layihədən kənar dam mənzilinin də gələcəyi yoxdur”.