“Etimadnaməmi Prezident İlham Əliyevə təqdim etməyimdən cəmi üç gün sonra bu gün sizinlə burada görüşməkdən böyük məmnunluq duyuram”.
Yeniera.az xəbər verir ki, bunu Böyük Britaniyanın Azərbaycandakı səfiri Dankan Norman bu gün keçirilən mətbuat konfransında deyib.
“Mən ilk dəfə 1999-cu ildə həyat yoldaşım Kerri ilə birlikdə Azərbaycana gəlmişdim. O zaman Azərbaycan bu vacib rolu öz üzərimə götürmək üçün bu il geri qayıdarkən gördüyüm ölkədən çox fərqli idi.
2025-ci ilin əvvəllərində mən Azərbaycan dilini öyrənərkən Gəncədə bir ailənin evində qalırdım. Məni evlərinə və həyatlarına qəbul edən bu ailənin səbri və səxavəti, mənə bu ölkə haqqında hər hansı sinif otağında öyrənə biləcəyim qədər çox şey öyrətdi.
Bu gün gördüyüm Azərbaycan ilk səfərimdə təsəvvür edilməsi belə çətin olan şəkildə dinamik, müasir və dünya ilə bağlantıları olan ölkədir. Lakin bir şey heç dəyişməyib: Azərbaycan xalqının istiqanlılığı və qonaqpərvərliyi”, – deyə səfir vurğulayıb.
Onun sözlərinə görə, Birləşmiş Krallıq Azərbaycanı mühüm regional tərəfdaş kimi qiymətləndirir: “Bu gün tərəfdaşlıq müdafiə, təhlükəsizlik, ticarət, təhsil, innovasiya və hər iki tərəfdə də dərin köklər salan xalqlararası əlaqələri ehtiva edir. Azərbaycan dəyərli tərəfdaşdır, iki ölkəni bir-biri ilə əlaqələndirən sıx münasibətlər və günümüzün əsas çətinlikləri və imkanları barədə ortaq baxışlar mövcuddur”.