“Qütbləşmiş dünyada media vasitəsilə etimadın qurulması” (“Building Trust through Media in a Polarized World”) mövzusuna həsr olunmuş CICA Media Forum çərçivəsində Bakı Konqres Mərkəzində Özbəkistanda yaradılan media məzmununun təşviqi və yayılması üzrə beynəlxalq platforma olan Tashkent Content Market (TCM)-in təqdimatı keçirilib.
Təqdimat Azərbaycan Respublikasının Media və Yayım Şurasının dəstəyi ilə təşkil olunub və Azərbaycanın televiziya və media sənayesinin aparıcı nümayəndələrini, eləcə də beynəlxalq media forumunun iştirakçılarını bir araya gətirib.
Təqdimat zamanı iştirakçılara Tashkent Content Market-in əsas fəaliyyət istiqamətləri, beynəlxalq əməkdaşlıq imkanları, həmçinin Özbəkistanda istehsal olunan televiziya, sənədli, əyləncə və rəqəmsal məzmunun xarici bazarlarda təşviqi perspektivləri təqdim edilib.
Xüsusi diqqət televiziya şirkətləri, media platformaları, prodüser mərkəzləri və hüquq sahibləri arasında beynəlxalq tərəfdaşlıqların inkişafına yönəldilib. İştirakçılara Özbəkistanda yaradılan məzmunun əldə edilməsi və distribusiyası imkanları, eləcə də media layihələrinin birgə istehsalı potensialı barədə məlumat verilib.
Tashkent Content Market-in beynəlxalq iştirakçıları sırasında Amazon MGM Studios, Prime Video, BBC Studios, CNN, Sony, Banijay Americas, NBCUniversal, Netflix, Roku, YouTube, Warner Bros., ZDF, Canal+, France TV, TF1, Tencent Video, iQIYI, mk2 və qlobal məzmun sənayesinin digər aparıcı nümayəndələri olan şirkət və media holdinqləri yer alır.
Təqdimat zamanı qeyd olunub ki, geniş beynəlxalq şirkətlər dairəsinin iştirakı Azərbaycan media sənayesinin nümayəndələri üçün də yeni imkanlar yaradır. Azərbaycanın televiziya kanalları, prodüser şirkətləri və hüquq sahibləri üçün Tashkent Content Market öz məzmunlarını beynəlxalq auditoriyaya təqdim etmək, distribusiya və birgə istehsal sahəsində yeni tərəfdaşlar tapmaq, həmçinin Mərkəzi Asiya və digər regionların şirkətləri ilə əməkdaşlığı genişləndirmək imkanı yaradacaq.
Tashkent Content Market-in müxtəlif ölkələrdən aparıcı məzmun istehsalçılarını, televiziya kanallarını, OTT platformalarını, distribyutorları və hüquq sahiblərini vahid platformada birləşdirərək MDB məkanının ən böyük kontent marketinə çevrilməsi gözlənilir.
Tashkent Content Market-də iştirak üçün qeydiyyatdan tədbirin tcm.uz ünvanında yerləşən rəsmi internet saytı vasitəsilə keçmək mümkündür.
