“Avropa Siyasi Birliyinin sammiti gələn ilin yazında Ermənistanda, eyni zamanda, İrlandiyada keçiriləcək. Məhz bu tədbirdə iştirak üçün iki qardaş ölkənin rəhbərinin İrəvana səfər edəcəkləri deyilir. Təbii ki, o zamana hələ yarım il var və bu müddətdə çox şeylər dəyişə bilər”.
AĞ Partiya başqanının müavini, beynəlxalq münasibətlər üzrə ekspert Cavanşir Abbaslı bunu Yeniera.az-a danışarkən bildirib.
O hesab edir ki, həmin vaxta qədər Azərbaycan-Ermənistan, Türkiyə-Ermənistan münasibətlərinin hansı səviyyədə olacağından çox şey asılı olacaq.
“Bu tədbirdə iştirak etmək üçün Azərbaycan Prezidenti İlham Əliyev və Türkiyə lideri Rəcəb Tayyib Ərdoğan İrlandiyaya da gedə bilərlər. Burada Azərbaycan və Türkiyə ilə Ermənistanın qarşıdan gələn 6 aydakı münasibətləri əsas rol oynayacaq. Türkiyə-Ermənistan sərhədləri hələ bağlıdır, doğrudur, Azərbaycanla Ermənistan arasında sülh öncəsi paraflanma sənədi imzalanıb, amma yekun sülh hələ əldə olunmayıb. Deməli, bu hələ hər şey demək deyil. Yəni Azərbaycan və Türkiyə rəhbərlərinin İrəvana səfərləri üçün hələ münbit şərait yetişməyib. Top Ermənistanın qapısındadır. Paşinyan hökumətinin qarşıdakı 6 ayda göstərdiyi fəaliyyət və yürütdüyü xarici siyasətdən çox şey asılıdır. Əks halda bu mümkünsüz görünür” , – deyə analitik fikrini sonlandırıb.
Vüsal Ömərov