Redaksiyamıza diş həkimi adı altında fəaliyyət göstərən şəxs barədə şikayət daxil olub.
Şikayətçi Tural Qoca News24.az-a açıqlamasında bildirib ki, “TikTok” platformasında özünü stomatoloq kimi təqdim edən Nicat Həsənov adlı şəxsin qəbulunda olub və sağlamlığına ciddi zərər dəyib:
“Videolarda guya çətin dişləri də asanlıqla çəkdiyini iddia edirdi. Mən də reklamına aldanaraq getdim, çünki problemli ağıl dişim vardı. Əksər həkimlər bu dişin yalnız cərrahi üsulla çıxarıla biləcəyini demişdi. Amma o, – həkimlər bacarmır, mən isə rahat çıxaracağam, – dedi.
İynə vurdu, dişim keyimədi. Təkrar iynə vurdu, lakin yenə effekt olmadı. Dəfələrlə ağrı hiss etdiyimi desəm də, – əsəbisən, ona görə keyimir, – cavabını verdi. Ardınca dişimi yonmağa başladı. Ağrı dözülməz idi, çənəm sanki sınacaqdı. Dayandırmağımı tələb etsəm də, – döz, bir şey olmaz, – deyə israr etdi. Nəticədə siniri açdı, damağa və çənə sümüyümə ciddi zərər verdi. Sonra antibiotik yazıb evə göndərdi, – iki gün iç, sonra gəl çıxardım, – söylədi. Bütün gecəni dəhşətli ağrılar içində keçirdim. Səhəri gün normal klinikaya getdim və dişim yalnız cərrahi yolla çıxarıldı. Nicat Həsənovun əməli isə sadəcə səriştəsizlik deyil, açıq cinayətdir”.
Şikayətçi iddia edib ki, Nicat Həsənovun stomatoloq kimi fəaliyyət göstərmək üçün heç bir diplomi yoxdur və fəaliyyət göstərdiyi yer tibbi müəssisə tələblərinə cavab vermir:
“Nicat Həsənovun işlədiyi yerdə nə klinika var, nə avadanlıq, nə də sanitariya şəraiti. Köməkçisi belə yoxdur. Sadəcə adi ev şəraitində, sanki bazarda diş çəkir Bu, qanunsuz fəaliyyət və insan həyatı ilə oynamaqdır”.
Məsələ ilə bağlı Nicat Həsənovla əlaqə saxladıq. O, şikayətçi ilə birbaşa danışmaq istədiyini bildirdi, lakin suallarımızı ətraflı cavablandırmadı. Diplomu olmadığı barədə iddianı isə təkzib etdi. Ancaq sənədin surətini təqdim etməkdən imtina etdi.
Məsələ ilə bağlı Analitik Ekspertiza Mərkəzinə ünvanladığımız sorğuya cavab olaraq bildirildi ki, Nicat Həsənovun adı “Tibb kadrlarının vahid reyestri”ndə mövcud deyil.