Mərkəzi Bankın direktoru “Fintrend”in sədrindən şikayət etdi – Cərimə edildi

“Fintrend” Bank Olmayan Kredit Təşkilatı (BOKT) Məhdud Məsuliyyətli Cəmiyyətinin (MMC) xanım direktoru cərimələnib.

Qaynarinfo-nun məlumatına görə, Mərkəzi Bank tərəfindən BOKT-da 2020-2025-ci illəri əhatə edən planlı tematik yoxlama aparılıb.

Yoxlama nəticəsində BOKT-da cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin bir sıra tələblərinin pozulması faktları aşkar edilib.

BOKT-un direktoru Qəmbərova Sevinc Azər qızı barəsində İnzibati Xətalar Məcəlləsinin 598.1.2-ci maddəsi ilə (Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin pozulması) protokol tərtib edilib və Mərkəzi Bankın Baş direktoru Fuad İsayev tərəfindən məhkəməyə müraciət olunub.

Məhkəmənin hökmü ilə Sevinc Qəmbərova İnzibati Xətalar Məcəlləsinin 598.1.2-ci maddəsi ilə təqsirli bilinib və 2000 manat cərimə edilib.

Qeyd edək ki, Sevinc Qəmbərova Azərbaycan Qiymətləndiricilər Palatasının sədr müavini Ayan Qəmbərovanın bacısıdır.

Məsələ ilə bağlı Ayan Qəmbərovaya zəng etsək də,cavab vermədi. Qarşı tərəfin də mövqeyini dərc etməyə hazırıq.