“Süni intellekt həyatımızın bir parçasına çevrilib. Artıq həyat tərzimizi onsuz təsəvvür edə bilmirik. Bu vasitənin durmadan ölkəmizdə inkişafı isə heç də neqativ nəticələrə yol açmır”.
Bu fikirləri Yeniera.az-a açıqlamasında “Medialive.az” informasiya portalının rəhbəri Mikayıl Mirzəzadə deyib.
O bildirib ki, İlham Əliyevin AMEA-da çıxışı zamanı süni intellektdən danışması bu vasitənin önəmini bir daha artırdı:
“Cənab Prezidentin AMEA-nın 80 illiyinə həsr edilmiş tədbirdə çıxışı zamanı süni intellekt barədə qiymətli fikirləri ona əsas verdi ki, doğrudan da süni intellekt Azərbaycan, eyni zamanda ölkəmizin müxtəlif və əhəmiyyətli sahələrində ciddi rol sahibi olub. Dövlət başçısının “biz bu sahədə Azərbaycan alimlərinin fəal iştirakını gözləyirik” fikirləri onun elmə göstərdiyi yüksək etimadın göstəricisidir”.
Baş redaktor qeyd edib ki, süni intellekt barədə hazırda müəyyən məhdudiyyətlər tətbiq edilə bilər:
“Ötən gün xarici KİV dünyaca nüfuzlu süni intellekt proqramı “ChatGpt”yə bəzi məhdudiyyətlər tətbiq edəcəyi barədə xəbərlər tirajlayıb. Deyilənə görə, ChatGPT artıq istifadəçilərə tibbi, hüquqi və iqtisadi məlumatlar verə bilməyəcək. Diqqətimi cəlb edən vacib məqam isə süni intellektin artıq təhsil vasitəsi kimi istifadə ediləcəyi oldu.
Bu proses birbaşa ötən gün İlham Əliyevin alimlərə ünvanladığı fikirlərdən qaynaqlanır. Süni intellekti təhsil sahəsində inkişaf etdirsək, gələcək üçün daha savadlı, peşəkar kadrlar hazırlamaq mümkün olar. Əgər kimsə süni zəka proqramlarını mənasız, bayağı elementlərə görə istifadə edir, onun beynini bu cür lazımsız informasiyalara kökləyirsə, demək, bu cür insanların özləri ağılsız və acizdirlər”.
Sayt rəhbəri sonda süni intellektin bəzi şəxslərə məhdudlaşdırılmasını təklif edib:
“Mən hesab edirəm ki, ağılsız və aciz insanlar üçün süni zəka proqramları ləğv edilsə, daha ədalətli olar. Çünki onların sözügedən vasitəni yoraraq, onun vaxtını gic-gic fikirlərlə alaraq istifadə etməsi məqsədəuyğun sayılmır”.
Ariz Həsənoğlu