Salyanda ağır qəza: gəlin və qayınana xəsarət aldı – Fotolar
Salyan rayonunda ağır yol-nəqliyyat hadisəsi baş verib.
Yeniera.az xəbər verir ki, hadisə dünən köhnə Ələt-Astara magistralının rayonun Seyidsadıqlı kəndi ərazisindən keçən hissəsində qeydə alınıb.
“BMW” və “VAZ 2107” markalı minik avtomobillərinin toqquşması nəticəsində 3 nəfər xəsarət alıb. Qəzada müxtəlif dərəcəli ağır bədən xəsarətləri alan rayonun Quyçu kənd sakinləri – 1946-cı il təvəllüdlü Naibə Hüseynova və onun gəlini 1969-cu il təvəllüdlü Dilarə Hüseynova Salyan Rayon Mərkəzi Xəstəxanasına çatdırılıb.
Onlardan birinin vəziyyətinin ağır olduğu bildirilir. Yaralananlardan digər xəsarət alan bir nəfər isə tibbi yardımdan imtina edib.
Salyan RMX-dən bildirilib ki, müxtəlif bədən xəsarətləri alan şəxslərə zəruri tibbi xidmətlər göstərilib. Hazırda onların müalicələri davam etdirilir, 1 nəfərin vəziyyəti orta ağır, digərinin vəziyyəti isə ağır qiymətləndirilir.
