ABŞ-də məşhur kulinariya layihəsi olan “Coffee Time with John and Momma”nın aparıcısı, 55 yaşlı Con Deyvis canlı yayım zamanı vəfat edib.
Ajans.az xəbər verir ki, hadisə iyunun 10-da Tennessi ştatının Celliko şəhərində yerləşən evində baş verib. People nəşrinin yaydığı məlumata görə, Kempbell dairəsi Şerif Ofisinə “nəfəs almayan kişi” barədə məlumat daxil olub. Hadisə yerinə gələn hüquq-mühafizə orqanlarının əməkdaşı Con Deyvisin həyatını itirdiyini təsdiqləyib.
Con Deyvis anası Frensis Deyvis ilə birlikdə sosial şəbəkələrdə gündəlik yemək bişirmə videoları paylaşaraq tanınırdı. “Coffee Time with John and Momma” layihəsinin Facebook səhifəsini 215 mindən çox istifadəçi izləyirdi, YouTube kanalının isə təxminən 8 min abunəçisi var idi.
Sosial şəbəkə istifadəçilərinin yazdıqlarına görə, Deyvis iyunun 10-da keçirilən canlı yayım zamanı qəfil özünü pis hiss edib. Hadisədən sonra həmin yayım layihənin bütün rəsmi səhifələrindən silinib.
Ana və oğulun son birgə videosu isə iyunun 9-da yayımlanıb. Görüntülərdə onlar nahar üçün Parmesan pendiri və ranç sousu ilə bişmiş pomidor hazırlayırlar.
Con Deyvisin ölüm səbəbi ilə bağlı rəsmi açıqlama hələlik verilməyib.