Daşınmaz əmlak satışında yeni mərhələ başlayır. Daşınmaz əmlak satışında yeni mərhələ başlayır.
Əmlak məsələləri üzrə ekspert Ramil Osmanlı Ajans.az-a bildirib ki, nəzərdə tutulan icbari qiymətləndirmə mexanizminin əsas məqsədi daşınmaz əmlak alqı-satqısı və bu sahədə aparılan əməliyyatların leqallaşdırılması, eyni zamanda daha şəffaf mexanizmin formalaşdırılmasıdır.
Onun sözlərinə görə, bu addım cinayət yolu ilə əldə edilmiş pul vəsaitləri və əmlakın leqallaşdırılmasına qarşı tədbirlər planının tərkib hissəsidir. Bu çərçivədə Ədliyyə Nazirliyi, Azərbaycan Qiymətləndiricilər Palatası və digər aidiyyəti qurumlar arasında elektron platformalar üzərindən inteqrasiya olunmuş əməkdaşlıq həyata keçiriləcək:
“Əsas yenilik satışa çıxarılan və üzərində alqı-satqı əməliyyatı aparılan daşınmaz əmlakların icbari qiymətləndirilməsidir. Bu mexanizm əmlakın dəyərinin süni şəkildə şişirdilməsi və ya aşağı göstərilməsi hallarının qarşısını almağa xidmət edəcək. Hazırda daşınmaz əmlak bazarında müxtəlif hüquqi uyğunsuzluqlarla rastlaşmaq mümkündür. Belə ki, bəzi hallarda torpaq sahəsinin sənədi olsa da, üzərindəki tikili sənədsiz olur, yaxud əksinə, mənzil alqı-satqı müqaviləsi ilə əldə edilsə də, çıxarış rəsmiləşdirilmir. Bu kimi qeyri-müəyyən vəziyyətlər həm bazarda, həm də hüquqi münasibətlərdə problemlər yaradır.”
Mütəxəssisin sözlərinə görə, yeni qaydalara əsasən vətəndaş notariat orqanına müraciət edərkən təqdim etdiyi sənədlər – çıxarış, texniki pasport, yüklülük barədə arayış və digər sənədlərlə yanaşı, əmlakın qiymətləndirilməsi aktını da təqdim etməli olacaq:
“Bu mexanizm daşınmaz əmlak bazarında şəffaflığı artıracaq, qeyri-rəsmi dövriyyəni azaldacaq, qiymət manipulyasiyalarının qarşısını alacaq və neqativ hallarla mübarizəyə töhfə verəcək. Sözügedən dəyişikliklər yalnız alıcı və ya satıcı üçün deyil, bazarın bütün iştirakçıları üçün faydalıdır. Layihə qəbul ediləcəyi təqdirdə Azərbaycanda daşınmaz əmlak bazarında beynəlxalq təcrübəyə uyğun daha şəffaf və etibarlı sistemin formalaşmasına, eyni zamanda yerli institusional təcrübənin inkişafına mühüm töhfə verəcək.”