Mənzilin və ya digər yaşayış sahəsinin qeyri-yaşayış sahəsinə çevrilməsi müəyyən hüquqi və inzibati prosedurların həyata keçirilməsini tələb edir. Bəs vətəndaş hansı hallarda yaşayış sahəsini qeyri-yaşayış sahəsinə çevirə bilər və bunun üçün hansı sənədlər lazımdır?
Mövzu ilə bağlı KONKRET.az-a danışan hüquqşünas Ramil Süleymanov bildirib ki, prosesə başlamaq üçün ilk növbədə aidiyyəti üzrə lisenziyalı layihələndirmə şirkətinə müraciət edilməlidir.
“Memar tərəfindən qeyri-yaşayış sahəsinin layihəsi hazırlanır. Daha sonra vətəndaş özünə məxsus çıxarışı, torpaq sahəsinə dair sənədi varsa, həmin sənədi və şəxsiyyət vəsiqəsini təqdim etməklə müvafiq rayon icra hakimiyyətinə müraciət edir. Müraciətdə yaşayış sahəsinin qeyri-yaşayış sahəsinə çevrilməsi ilə bağlı sərəncamın verilməsi xahiş olunur”, – deyə hüquqşünas qeyd edib.
Onun sözlərinə görə, aidiyyəti icra hakimiyyəti tərəfindən yaşayış sahəsinin qeyri-yaşayış sahəsinə keçirilməsi məqsədəuyğun hesab edildiyi halda, bununla bağlı müvafiq sərəncam qəbul edilir.
“Əgər yaşayış sahəsinin qeyri-yaşayış sahəsinə çevrilməsi icra hakimiyyəti tərəfindən məqbul hesab edilərsə, müvafiq sərəncam verilir. Bundan sonra həmin sənədlər Daşınmaz Əmlakın Kadastrı və Reyestri publik hüquqi şəxsinə təqdim olunur və əmlaka dair yeni çıxarışın verilməsi təmin edilir”, – Ramil Süleymanov bildirib.
Hüquqşünas əlavə edib ki, aidiyyəti qurum tərəfindən imtina verildiyi halda vətəndaşın məhkəməyə müraciət etmək hüququ var.
“Əgər vətəndaşın müraciətinə imtina cavabı verilərsə, o, bununla bağlı məhkəməyə müraciət edə bilər. İddia ərizəsində yaşayış sahəsinin qeyri-yaşayış sahəsinə çevrilməsi ilə bağlı öhdəliyin həmin qurumun üzərinə qoyulmasını məhkəmədən xahiş edə bilər. Məhkəmənin qərarı əsasında da yaşayış sahəsinin qeyri-yaşayış sahəsinə çevrilməsi mümkündür”, – hüquqşünas vurğulayıb.
Beləliklə, yaşayış sahəsinin qeyri-yaşayış sahəsinə keçirilməsi üçün yalnız mənzil sahibinin istəyi kifayət etmir. Bunun üçün layihələndirmə sənədlərinin hazırlanması, aidiyyəti dövlət qurumuna müraciət edilməsi və müvafiq qərarın alınması tələb olunur. Aidiyyəti qurum tərəfindən imtina verildiyi halda isə vətəndaş məsələni məhkəmə qaydasında həll edə bilər.