Musavat.com xəbər verir ki, ABŞ Prezidenti Donald Tramp jurnalistlər üçün keçirilən brifinqdə xarici siyasət və beynəlxalq gərginliklərlə bağlı bir sıra qalmaqallı və diqqətçəkən açıqlamalar verib.
Kım Çen Inlə münasibətlər
Jurnalistin Şimali Koreya liderinin danışıqlar təklifinə cavab verməməsi barədə sualına Tramp “Siz haradan bilirsiniz?” deyə reaksiya verib və onun cavab verdiyini bildirib:
“Bəli, cavab verdi. Kım Çen In mənə həmişə böyük hörmətlə yanaşıb. Biz bir yerdə vaxt keçirmişik. Mən onu anlayıram, o da məni anlayır. O, heç kimi sevmirdi, lakin mən onunla çox yaxşı yola gedirəm”.
Oman və Hörmüz boğazı haqqında xəbərdarlıq
Oman administrasiyasının hərəkətlərinə toxunan Ağ Ev rəhbəri bu ölkənin ünvanına xəbərdarlıq səsləndirib: “Düşünmürəm ki, onlar özlərini çox yaxşı aparırlar, lakin biz onlarla məsələni həll edəcəyik”.
Tramp həmçinin Hörmüz boğazı üzərində nəzarətdən və neft bazarındakı vəziyyətdən danışıb: “Hörmüz boğazını ABŞ ərazisi elan etmək ideyası xoşuma gəlir. Biz boğaza tam nəzarət edirik. Həftədə milyonlarla barel həcmində nefti məhv edirik — bəlkə bu dayanacaq, bəlkə də vəziyyət daha da kəskinləşəcək. Boğaz açıqdır, neft qiymətləri aşağı düşür və hazırda atdığımız addımlardan daha kəskin tədbirlər görməsək, ucuzlaşmaqda davam edəcək”.
Ağ Ev rəhbəri əlavə edib ki, ABŞ İranla Anlaşma Memorandumunun uzadılmasına çalışmır.
Cənubi Koreyaya kəskin təpki
Tramp Cənubi Koreya prezidenti ilə telefon danışığını xatırladaraq Seulun mövqeyini kəskin tənqid edib:
“Mən Cənubi Koreya prezidentinə zəng edib dedim: «İranla bağlı bizə kömək edə bilərsiniz? İstəyirsinizsə edin, amma bizə kömək lazım deyil». O cavab verdi ki, «Xeyr, təşəkkür edirəm». Mən dedim: «Nə demək istəyirsiniz? Bizim orada sizi Kım Çen Indən qoruyan 39 000 hərbçimiz var, siz isə İran məsələsində bizə kömək etmək niyyətində deyilsiniz? Bu qəribədir». O zaman biz ümumiyyətlə niyə sizə kömək etməliyik? Cənubi Koreyanın müdafiəsi bizə milyardlarla dollara başa gəlir. Xüsusilə bizə kömək etməyə hazır olmadıqları bir vaxtda, bütün dünyanı dolaşıb bütün bu ölkələri daimi olaraq qoruya bilmərik”.