Türkiyənin xüsusi nümayəndəsi Sərdar Kılıçla görüş yaxın günlərdə Ermənistanda keçiriləcək.
Yeniera.az xəbər verir ki, bu barədə Ermənistan parlamentinin vitse-spikeri, Ermənistanın Türkiyə ilə münasibətlərin normallaşdırılması üzrə xüsusi nümayəndəsi Ruben Rubinyan bildirib.
Onun sözlərinə görə, vaxtı gələndə əlavə məlumat veriləcək.
Rubinyan qeyd edib ki, görüşün gündəliyinə Ermənistan-Türkiyə münasibətlərinin normallaşdırılması prosesi daxil ediləcək, indiyə qədər atılan, hələ də davam edən addımlar müzakirə olunacaq: “Bilirsiniz ki, bu illər ərzində müzakirə olunan bir neçə mövzu olub, son görüşümüzdən sonra Qars-Gümrü dəmir yolunun bərpasının zəruri texniki parametrlərini müzakirə etmək üçün görüş keçirilib, tarixi Ani tarixi körpüsünün bərpası məsələsi var və bütün bu spektr müzakirə olunacaq. Ümumiyyətlə, əsas mövzu münasibətlərin nizamlanmasıdır”.