Ötən yaz aylarında müşahidə olunan şiddətli yağışlar Bakı və Abşeron yarımadasında infrastruktur çatışmazlığı olan ərazilərdə fərdi yaşayış mənzillərinin zəif tərəflərini bir daha üzə çıxardı. Payız mövsümünün gəlişi və yağmurların başlaması ilə daşınmaz əmlak bazarında subasma riski yüksək olan konkret qəsəbələr üzrə qiymətlərin enməsi gözlənilir. Ekspertlərin təhlillərinə və bazar göstəricilərinə əsasən, payızda ümumi bazar sabit qalsa da, zərərçəkmiş zonasında yerləşən evlərin qiymətində 8%-dən 18%-ədək ciddi ucuzlaşma proqnozlaşdırılır.
Yeniera.az xəbər verir ki, ucuzlaşma dinamikası əsasən relyef baxımından çökəklikdə yerləşən, qrunt sularının səviyyəsi yüksək olan və mərkəzləşdirilmiş drenaj sistemi bulunmayan qəsəbələrdə daha qabarıq özünü göstərəcək. Konkret olaraq, Sabunçu rayonunun Zabrat, Maştağa, Savalan yaşayış massivi və Ramana qəsəbələrində yerləşən, keçən mövsümdə həyətyanı sahələrini su basmış evlərin kvadratmetrinin orta qiymətində 12-15% civarında düşmə gözlənilir. Əvvəllər orta hesabla 50.000–60.000 manat aralığında təklif olunan 3 otaqlı təmirsiz və ya zəif təmirli fərdi evlərin qiymətinin 42.000–50.000 manat diapazonuna qədər geriləyəcəyi proqnozlaşdırılır.
Oxşar mənzərə Abşeron rayonunun Xırdalan şəhərinin aşağı hissələrində, Masazır qəsəbəsinin duz gölü ətrafındakı dik yoxuş və çökək ərazilərində, həmçinin Mehdiabad və Saray qəsəbələrinin infrastrukturdan kənar massivlərində də gözlənilir. Bu ərazilərdə subasma fəsadları tam aradan qaldırılmayan mülklər üçün alıcıların tələb etdiyi endirim faizi 10-18% təşkil edir. Məsələn, Masazırın aşağı massivlərində yağış sularının toplandığı küçələrdəki 70.000 manatlıq həyət evlərinin real satış qiymətinin 58.000–62.000 manat səviyyəsinə düşəcəyi ehtimal olunur. Su və kanalizasiya xətləri qaydasında olmayan Suraxanı (Bülbülə, Hövsan) və Binəqədi (Binəqədi qəsəbəsi, “Baksol” yolu ətrafı) ərazilərində isə ucuzlaşmanın 8-12% aralığında olacağı bildirilir.
Rəqəmsal göstəricilər təsdiq edir ki, alıcılar artıq təkcə evin daxili kvadratmetrinə deyil, torpağın drenaj imkanlarına üstünlük verirlər. Nəticədə, subasma riski olan qəsəbələrdə likvidlik — yəni evin tez satılma imkanı 25-30% azalacaq və bu evlər bazarda daha uzun müddət alıcısız qalacaq. Əksinə, nisbətən hündür ərazilərdə və infrastrukturu tam olan qəsəbələrdə (Mərdəkan, Şüvəlan, Bilgəh kimi təhlükəsiz zonalarda) həyət evlərinin qiymətləri sabit qalacaq, hətta tələbatın ora yönəlməsi hesabına 3-5% qiymət artımı müşahidə ediləcək. (yeni sabah)