Azərbaycanda kredit borcu olan şəxsləri maraqlandıran məsələlərdən biri də hansı hallarda bank qarşısında olan öhdəliklərin silinməsinin mümkün olmasıdır. Maddi çətinlik, işsizlik və ya gəlirin azalması kredit öhdəliyinin avtomatik ləğvi üçün əsas sayılmasa da, qanunvericilikdə və bank təcrübəsində borcun tam və ya qismən bağlanmasına imkan verən hallar mövcuddur.
YENİERA.AZ xəbər verir ki, kredit borcunun silinməsi bir neçə fərqli hüquqi və maliyyə vəziyyətində mümkün ola bilər.
Belə ki, kredit şəxsin xəbəri və razılığı olmadan, saxta sənədlər və ya dələduzluq yolu ilə rəsmiləşdirilibsə, bu hal araşdırıla və müvafiq hüquqi prosedurlar əsasında borca xitam verilməsi məsələsinə baxıla bilər.
Digər bir hal kreditin sığortalanması ilə bağlıdır. Əgər kredit müqaviləsi üzrə sığorta təminatı mövcuddursa və borcalanın ölümü, əmək qabiliyyətini itirməsi və ya digər sığorta hadisəsi müqavilədə nəzərdə tutulubsa, borcun ödənilməsi sığorta şirkətinin üzərinə düşə bilər. Bunun üçün hadisənin sığorta şərtlərinə uyğunluğu təsdiqlənməlidir.
Bundan başqa, banklar müəyyən hallarda öz təşəbbüsləri ilə müştərilərin borclarının bir hissəsini və ya hamısını silə bilərlər. Lakin bu, bankın qərarından və konkret kreditin vəziyyətindən asılıdır.
Dövlət tərəfindən xüsusi qərar qəbul edildiyi halda da müəyyən kateqoriyadan olan borcalanlar güzəştlərdən yararlana bilərlər. Buna nümunə olaraq 2019-cu ildə Azərbaycanda problemli kreditlərlə bağlı həyata keçirilən dövlət proqramını göstərmək olar.
Kredit borcları ilə bağlı diqqət çəkən məqamlardan biri də iddia müddətidir. Müəyyən müddətin keçməsi borcun avtomatik silinməsi demək deyil. Bununla belə, qanunvericilikdə nəzərdə tutulan şərtlər daxilində borclu məhkəmədə iddia müddətinin tətbiqini tələb edə bilər.
Qeyd edək ki, borcalanın vəfat etməsi də kredit borcunun avtomatik ləğvinə səbəb olmur. Belə vəziyyətlərdə kredit üzrə sığorta təminatı, miras və digər hüquqi hallar nəzərə alınır.
Beləliklə, işsiz qalmaq, pensiya almaq, gəlirin azalması və ya kredit ödənişlərini həyata keçirə bilməmək özlüyündə borcun silinməsi üçün hüquqi əsas yaratmır. Hər bir müraciət konkret müqavilə və qanunvericiliyin tələbləri əsasında qiymətləndirilir.///Sfera.az

