General-leytenant Heydər Piriyevin zabit yoldaşları ilə birlikdə çəkdirdiyi maraqlı foto sosial şəbəkələrdə yayılıb.
Yeniera.az xəbər verir ki, arxiv xarakterli olduğu ehtimal edilən görüntüdə general-leytenant Heydər Piriyev bir qrup zabitlə birlikdə əks olunub.
Foto Piriyevin uzun illər Azərbaycan Ordusunda xidmət etdiyi dövrlə bağlı diqqət çəkən görüntülərdən biri kimi maraq doğurub.
Heydər Piriyev kimdir?
General-leytenant Heydər Kamal oğlu Piriyev Azərbaycan Silahlı Qüvvələrinin tanınmış hərbçilərindəndir. O, 1959-cu ildə anadan olub və hərbi xidmətə Sovet ordusu dövründə başlayıb. 1991-ci ildən Azərbaycan Silahlı Qüvvələrində xidmət edib.
Heydər Piriyev 1992-1994-cü illərdə Birinci Qarabağ müharibəsində gedən döyüşlərdə iştirak edib. Sonrakı illərdə Azərbaycan Ordusunda müxtəlif rəhbər vəzifələrdə çalışıb. 2002-2009-cu illərdə Heydər Əliyev adına Ali Hərbi Məktəbin rəisi, 2009-2013-cü illərdə isə Naxçıvan Muxtar Respublikasında Ordu Korpusunun qərargah rəisi vəzifəsini tutub.
2014-cü ilin iyununda Prezident İlham Əliyevin sərəncamı ilə Heydər Piriyevə general-leytenant ali hərbi rütbəsi verilib.
O, uzun müddət Silahlı Qüvvələrin Hərbi Akademiyasına rəhbərlik edib. Müdafiə Nazirliyinin materiallarında onun Hərbi Akademiyanın rəisi kimi çıxışları və hərbi təhsil sahəsində fəaliyyəti də yer alıb.
2020-ci il Vətən müharibəsi zamanı göstərdiyi xidmətlərə görə Heydər Piriyev “Azərbaycan Bayrağı” ordeni ilə təltif olunan hərbçilər arasında olub. Prezidentin sərəncamında onun ərazi bütövlüyünün bərpası zamanı döyüş əməliyyatlarına yüksək peşəkarlıqla rəhbərlik edən hərbçilərdən biri olduğu qeyd edilib.
2022-ci ildə isə general-leytenant Heydər Piriyev Milli Müdafiə Universitetinin rektoru təyin olunub, 2024-cü ildə bu vəzifədən azad edilib./Bakıvaxtı.az/
