Sosial şəbəkədə “İrşad” mağazalar şəbəkəsində onlayn sifarişlə bağlı narazılıq doğuran hadisə barədə paylaşım edilib.
Yeniera.az xəbər verir ki, paylaşım müəllifi bildirir ki, 26 avqust 2026-cı il tarixində “İrşad”ın rəsmi onlayn mağazasından LG markalı paltaryuyan maşın və 1300 manat dəyərində Xiaomi TV A 65” televizor sifariş edib. Malların çatdırılması zamanı isə televizorun qutusunun əvvəlcədən açıldığını müşahidə edib.
Müştərinin sözlərinə görə, kuryerlər qutunun anbardan çıxarılarkən yoxlama məqsədilə açıldığını bildiriblər. Lakin televizorun komplektasiyası ilə bağlı yaranan vəziyyət müştərinin şübhələnməsinə səbəb olub.
Belə ki, paylaşımda televizorun qutusundan Avropa standartlı kabelin çıxmadığı, kuryerlərin isə məhsulun komplektində belə kabelin olmadığını bildirdiyi qeyd olunur. Müştəri isə eyni model televizoru yaxın günlərdə aldığı üçün həmin modelin komplektasiyasının fərqli olduğunu iddia edir.
Məsələ ilə bağlı tərəflər arasında razılıq əldə olunmadığından müştəri televizoru qəbul etməkdən imtina edib.
Bundan sonra “İrşad”ın qaynar xətti ilə əlaqə saxladığını bildirən vətəndaşın sözlərinə görə, ona problemin həlli üçün əvvəlcə məhsulun anbara qaytarılmasının gözləniləcəyi deyilib.
Paylaşımda qeyd olunur ki, şirkət müştəri ilə 3 iş günü ərzində əlaqə saxlayacağını bildirib. Televizorun başqa məhsulla əvəz olunması halında da əlavə olaraq 3 iş günü gözləməyin tələb olunduğu, ödənişin geri qaytarılması üçün isə 14 iş günü müddətinin bildirildiyi iddia edilir.
Nəticədə müştəri 1300 manat ödəniş etdiyi halda nə televizordan istifadə edə bildiyini, nə də pulunu geri aldığını bildirir.
Vətəndaş məsələ ilə bağlı Antiinhisar və İstehlak Bazarına Nəzarət Dövlət Agentliyinə, eləcə də digər aidiyyəti qurumlara diqqət yetirməyə çağırış edib.
Xüsusilə məhsulun qutusunun açıq olması, komplektasiyada çatışmazlıq iddiası və ödənişin geri qaytarılması ilə bağlı prosedur müştəridə ciddi narazılıq yaradıb.
Qeyd edək ki, sözügedən məlumat sosial şəbəkədə yayılan vətəndaş paylaşımına əsaslanır. İddiaların həqiqətə uyğun olub-olmaması aidiyyəti qurumların araşdırması və tərəflərin təqdim edəcəyi sənədlər əsasında müəyyən edilə bilər.
Məsələ ilə bağlı “İrşad”ın mövqeyini dərc etməyə hazırıq.
/”Real Azərbaycan”/