Rusiya Prezidenti yanında beynəlxalq mədəni əməkdaşlıq üzrə nümayəndə Mixail Şvıdkoy Yaponiyaya səfəri zamanı rus jurnalistləri ilə söhbətində Azərbaycanla bağlı diqqətçəkən açıqlama verib.
Yeniera.az Musavat.com-a istinadla xəbər verir ki, Rusiya ilə Azərbaycan arasında informasiya müharibəsinin kəskinləşdiyi bir vaxtda Kreml rəsmisinin bu mövqeyi sensasion bəyanat kimi dəyərləndirilir.
Şvıdkoy bildirib ki, Rusiya və Azərbaycan kimi yaxın qonşular bütün gərginliklərə baxmayaraq, ikitərəfli münasibətlərdə müsbət məqamları önə çıxarmalı və mədəni dialoqu bərpa etməyə çalışmalıdırlar.
Onun sözlərinə görə, SSRİ dağılandan sonra yaranmış müstəqil dövlətlərin artıq 35 ildir öz mədəni siyasəti var və Moskva bu siyasətə hörmətlə yanaşmalıdır:
“Əgər biz istəyiriksə ki, bizim mədəni siyasətimizə hörmətlə yanaşılsın, onda gərək biz də onların mədəni siyasətinə hörmət edək. Məncə, qarşılıqlı ittihamların hiddətini azaltmağa dəyər”.
O, həmçinin Azərbaycanın “Intervideniya-2025” beynəlxalq mahnı müsabiqəsində iştirak etməyəcəyi ilə bağlı yayılan xəbərlərə də münasibət bildirib. Şvıdkoy qeyd edib ki, bu cür qərarlar hər bir ölkənin daxili siyasəti ilə bağlıdır və kənardan təzyiq göstərmək doğru deyil.
Rusiya rəsmisi Azərbaycanın təyyarə hadisəsi ilə bağlı mövqeyində qaldığını, bunun fonunda isə rus vətəndaşlarının taleyi ilə bağlı problemlərin mövcud olduğunu xatırladaraq deyib:
“Lakin mən düşünürəm ki, biz hələ də bu çətinliklərə baxmayaraq qarşılıqlı maraqların mövcud olduğu dünyada yaşayırıq. Coğrafiya – taledir; biz qonşuyuq, siyasi hadisələr necə inkişaf etsə də. Bizim başqa qlobusumuz yoxdur”.
Xatırladaq ki, “Intervideniya” müsabiqəsinin mətbuat xidməti TASS-a açıqlamasında Azərbaycan və BƏƏ-nin hələlik rəsmi qərar təqdim etmədiyini bildirmişdi. Rusiya XİN-in humanitar əməkdaşlıq üzrə departament rəhbəri Aleksandr Alimov isə bəyan etmişdi ki, siyahıya bütün ölkələr daxil edilməyib, lakin siyasi motivlərlə heç kimə imtina edilməyib.
Rusiya ilə Azərbaycan arasında son aylarda informasiya müharibəsi getdiyi bir vaxtda, Moskva rəsmisinin “ittihamların hiddətini azaltmaq” və “mədəni dialoqu bərpa etmək” çağırışı sensasion açıqlama kimi qiymətləndirilir.