Lənkəran rayonu Tükəvilə kənd orta məktəbin direktoru Günay ismayilova barəsində sensasional iddialar səsləndirilib.
Bu barədə Medialive.az-a adının çəkilməsini istəməyən mənbə məlumat verib.
Onun dediklərinə görə, Günay İsmayılova dəfələrlə direktorluğa görə imtahan və müsahibələrdən keçə bilmədiyi halda illərdir postunda qalır.
Qeyd edilib ki, G.İsmayılova bu prosesdən sui-istifadə edərək Tükəvilə kənd camaatından müxtəlif vədlərlə pul alıb. O, bildirir ki, direktor məktəb heyəti və kənd camaatından ümumilikdə 200 min manat məbləğində vəsait alıb.
Şikayətçi iddia edir ki, məktəbin müəllim heyətinin lotoreya pullarını alaraq geri qaytarmayıb. Bu əməllərinə görə ondan şikayət olunub və direktora cinayət işi açılıb.
Şikayətçi şəxs əlavə edib ki, bütün baş verənlər fonunda direktor vəzifəsindən azad edilməsi əvəzinə bu il sentyabrın 15-də yeni tədris ilində işinə qaytarılıb.
G.İsmayılovanın işindən azad edilməsi məktəb kollektivi arasında ciddi müzakirələrə səbəb olub.
Şikayətçi əlavə edib ki, direktorun qanunsuzluqlarına xüsusən direktor müavinləri şərait yaradaraq göz yumurlar.
İddia olunur ki, borcunu tələb edən şəxslərin sayının artmasından sonra Günay İsmayılova müəyyən müddət iş yerinə gəlməyib və vətəndaşlarla təmasdan yayınmağa çalışıb.
Şikayətçi sonda əlavə edib ki, bütün sadalanan iddiaları isbat edən səs yazıları mövcuddur. Lazım bilinərsə, audio faylları aidiyyatı qurumlara təqdim etməyə hazırdır.
Məsələ ilə bağlı redaksiyamız tərəfindən MÜTDA-ya sorğu göndərilsə də, suallarımız cavabsız qalıb.
DİN-dən Medialive.az-ın sorğusuna cavab olaraq bildirilib ki, faktla bağlı polis orqanında Cinayət Məcəlləsinin müvafiq maddəsilə Cinayət işi başlanılıb, hazırda istintaq araşdırmaları davam etdirilir.
Sonda onu da qeyd edək ki, şikayətçi yaxın günlərdə Günay İsmayılovanın dələduzluq əməlləri ilə bağlı yeni faktlar, sübutlar təqdim edəcəyini bildirib.