Xəbər verdiyimiz kimi, Azərbaycan Respublikası Prokurorluğunun bir qrup əməkdaşına ali xüsusi və ali hərbi rütbələr verilib. Prezident İlham Əliyevin imzaladığı sərəncama əsasən, Naxçıvan Muxtar Respublikasının prokuroru Sənan İsa oğlu Paşayevə II dərəcəli dövlət ədliyyə müşaviri, Baş prokuror yanında Korrupsiyaya qarşı Mübarizə Baş İdarəsinin rəis müavinləri Emin Ramiz oğlu Mürsəliyev və Asəf Vaqif oğlu Sarıkişiyevə III dərəcəli dövlət ədliyyə müşaviri, Azərbaycan Respublikası Hərbi prokurorunun müavini Nihad Ənvər oğlu Şıxəliyevə isə ədliyyə general-mayoru ali hərbi rütbəsi verilib.
Yeniera.az ali rütbələrə layiq görülən şəxslərlə bağlı məlumatları təqdim edir:
Sənan Paşayev – O, Prezident İlham Əliyevin 23 may 2023-cü il sərəncamı ilə Naxçıvan Muxtar Respublikasının prokuroru təyin olunub. 30 dekabr 2022-ci ildə Azərbaycan Respublikasının Baş prokuroru Kamran Əliyevin əmri ilə Naxçıvan Muxtar Respublikası prokurorunun müavini vəzifəsinə təyin edilib. O, bu postda sabiq sədr Vasif Talıbovun qardaşı Məhərrəm Talıbovu əvəz etmişdi. S.Paşayev daha əvvəl Baş Prokurorluğun İstintaq idarəsinin rəis müavini olub. Prokuror prezident tərəfindən “Dövlət qulluğunda fərqlənməyə görə” medalı ilə təltif edilib.
Emin Mürsəliyev – O, Baş prokuror yanında Korrupsiyaya qarşı Mübarizə Baş İdarəsinin rəis müavinidir. O, prokurorluq sistemində uzun müddət fəaliyyət göstərən və korrupsiyaya qarşı mübarizə istiqamətində rəhbər vəzifə tutan şəxslərdən biridir. Mürsəliyev 2020-ci ildə Prezidentin sərəncamı ilə prokurorluq orqanlarında xidməti vəzifələrin icrası zamanı fərqləndiyinə görə “Tərəqqi” medalı ilə təltif edilib. Hazırda Baş İdarənin rəhbərliyində fəaliyyət göstərən Mürsəliyev Prezidentin yeni sərəncamı ilə III dərəcəli dövlət ədliyyə müşaviri ali xüsusi rütbəsinə layiq görülüb.
Asəf Sarıkişiyev – O, Baş prokuror yanında Korrupsiyaya qarşı Mübarizə Baş İdarəsinin rəis müavinidir. O, prokurorluq sistemində uzunmüddətli xidmət yolu keçmiş rəhbər şəxslərdən hesab olunur. Sarıkişiyevin adı Prezidentin 2018-ci il tarixli sərəncamında da yer alıb. Həmin sərəncamla o, “Dövlət qulluğunda fərqlənməyə görə” medalı ilə təltif olunan prokurorluq əməkdaşları sırasında olub. Hazırda korrupsiyaya qarşı mübarizə sahəsində rəhbər vəzifələrdən birini tutan Sarıkişiyevə yeni sərəncamla III dərəcəli dövlət ədliyyə müşaviri ali xüsusi rütbəsi verilib.
Nihad Şıxəliyev – O, 2025-ci ilin iyulundan Azərbaycan Respublikası Hərbi prokurorunun müavini vəzifəsini tutur. Daha əvvəl isə Hərbi Prokurorluğun Ərizə və müraciətlər şöbəsinin rəisi olub.
