Türkiyə Prezidenti Recep Tayyip Erdoğan İrandan atılan və Türkiyə hava məkanına daxil olduğu müəyyən edilən ballistik raketin Gaziantep üzərində zərərsizləşdirilməsi ilə bağlı ilk açıqlamasını verib.
YENİERA.az xəbər verir ki, Nazirlər Kabinetinin iclasından sonra çıxış edən Ərdoğan bildirib ki, İran bu cür addımlarla iki ölkə arasında min illik qonşuluq münasibətlərini təhlükə altına atmamalıdır.
Prezident bildirib: “İran min illik qonşuluq münasibətlərimizə kölgə salacaq hesablamalarla məşğul olmamalıdır. İran səhvində israr etməməlidir. Əks halda Türkiyə əlavə tədbirlər görəcək”.
Ərdoğanın sözlərinə görə, İrandan buraxılan və Türkiyə istiqamətində hərəkət etdiyi müəyyən edilən ballistik raket Qaziantep üzərində vurularaq zərərsizləşdirilib. O xatırladıb ki, martın 4-də də İrandan atılan və İraq və Suriya hava məkanından keçərək Türkiyəyə doğru yönələn raket NATO sistemləri tərəfindən məhv edilmişdi.
Prezident qeyd edib ki, Türkiyə böhranla bağlı bütün inkişafları diqqətlə izləyir və dövlət qurumları yüksək hazırlıq vəziyyətindədir.
Ərdoğan bildirib ki, Türkiyə regionda gərginliyin artmasının qarşısını almaq üçün diplomatik fəaliyyətini davam etdirir:
“Biz münaqişələrin və qan tökülməsinin yayılmasının qarşısını almaq üçün çalışırıq. Oda yağ tökənlərə baxmayaraq, biz onu söndürmək üçün səmimi mübarizə aparırıq”.
Türkiyə lideri əlavə edib ki, ölkə rəhbərliyi İran böhranını və mümkün ssenariləri Nazirlər Kabinetində geniş şəkildə müzakirə edib və bütün qurumlar vəziyyəti anbaan izləyir.
Ərdoğan həmçinin bildirib ki, Türkiyə diplomatik kanalları aktiv saxlayır və bu çərçivədə son günlər müxtəlif ölkələrin liderləri ilə çoxsaylı təmaslar həyata keçirilib.